İranda Azərbaycan türklərinin milli-mədəni haqları uğrunda dinc mübarizə apardığına görə 11 aydır Tehranın Evin zindanında saxlanılan tanınmış fəal Siyamək Mirzayi, həmin həbsxananın 8-ci korpusunun rəisinə açıq məktub yazaraq vəziyyətinin qeyri-müəyyənliyinin davam etdirilməsinə etiraz bildirib.

Fəal öz məktubunda bildirib ki, əgər Apellyasiya Məhkəməsinə təqdim ediləcək onun dosyesində olan maneələr aradan qaldırılmasa və müvəqqəti azadlığa buraxılması üçün təyin edilən mülki vəsiqə girovu məbləğinin azaldılması üçün güzəştə gedilməsə, o, bu qeyri-müəyyən vəziyyətin davam etdirilməsinə etiraz əlaməti olaraq iyunun 17-dən aclıq aksiyasına başlayacaq: «Aclıq aksiyası dövründə mənə yetiriləcək hər hansı bir fiziki və psixi zərər-ziyanın məsuliyyəti isə, ETTELAAT Nazirliyi əməkdaşlarının, Məhkəmə Sistemi orqanlarında çalışan şəxslərin, Tehran və Muğan Parsabadının şəhər məhkəmə prokurorlarının, eləcə də müstəntiq Rəcəbi və hakim Həsəninin üzərinə düşəcək».

«ETTELAAT» əməkdaşları, 36 yaşlı Siyamək Mirzayini, 2016-cı il, iyulun 14-ü axşam saatlarında Ərdəbilin yaxınlığındakı Parsabad şəhərində şəxsi ərzaq mağazasında tutublar. Tutulduqdan sonra, o əvvəlcə ETTELAAT-ın yerli idarəsinə aparılsa da, sonradan Tehranın Evin zindanına köçürülüb. O, hazırda həmin həbsxananın 8-ci korpusunda saxlanılır.

Tehran inqilab məhkəməsi, Siyamək Mirzayini ölkənin milli təhlükəsizliyinə qarşı çıxmaqda və  qanunsuz qurum yaratmaqda günahlandırılaraq onu 10 il həbsə və 2 il Cənubi Xorasan əyalətinin Təbəs şəhərinə sürgünə məhkum edib.

Bundan əvvəl fəalın Apellyasiya Məhkəməsinin mayın 17-də keçiriləcəyi bildirilsə də, həmin gün, onun işi (dosyesi) məhkəməyə təqdim edilmədiyinə və digər naməlum səbəblərə görə məhkəmə iclası yenidən təxirə salınıb. Məhkəmənin dəqiq vaxtı barədə hər hansı bir məlumat verilməyib.