Sentyabrın 2-də gecə xeyli adam Astanada Almatı və Türküstan küçələrini bağlayıb. Hadisə yerinə dubinka və qalxanlarla silahlanmış xüsusi təyinatlı dəstə yeridilib. Bundan başqa ora yanğınsöndürənlər, «təcili yardım» briqadaları və iki avtobusla əlavə polis qüvvələri cəlb olunub.

Daxili İşlər Nazirliyinin məlumatına görə, «Əbu-Dabi Plaza» ərazisində Hindistandan olan fəhlələrlə Qazaxıstan vətəndaşları arasında dava olub. Dava mühafizəçinin sərxoş halda olan hindlini içəri buraxmaqdan imtina etməsinə görə başlayıb. Hindistandan olan fəhlə öz həmyerlilərini köməyə çağırıb və onlar mühafizəçini döyüblər. Yerli fəhlələr isə mühafizəçini müdafiə ediblər, nəticədə təxminən 30 insanın iştirak etdiyi kütləvi dava baş verib.

Qarışıqlıqlara görə 41 nəfər saxlanılıb, onların arasında əcnəbi yoxdur. Bütün qazaxstanlıları yoxlama üçün daxili işlərin orqanlarının bölmələrinə aparıblar. Onlardan bir çoxu sərxoş halda olub.

Virtualaz.org-un informburo.kz-a istinadən məlumatına görə, baş prokurorun müavini Andrey Lukin bildirib ki, hazırda vəziyyət nəzarət altındadır.