Corc Buş (George H.W. Bush) 93 il və 166 gün yaşamaqla Birləşmiş Ştatların tarixində ən uzunömürlü prezident olub. O özündən əvvəlki rekordçu - Cerald Fordu (Gerald Ford) ötən şənbə günü keçib. C.Ford 93 il 165 gün yaşayıb.

Üçüncü yerdə olan Ronald Reyqanın (Ronald Reagan) ömrü isə 93 il 120 gün olub.

Hazırda yaşayan, siyahıda isə dördüncü olan Cimmi Karterin (Jimmy Carter) yaşı 93 il 56 gündür.

Ronald Reyqanın hakimiyyətində iki müddət (8 il) vitse-prezident olmuş cənab Buş Ağ Evdə 1988-ci ildə sakin olub. O, Bill Klintona məğlub olanda, cəmi bir müddət (4 il) prezidentlik etmişdi.

ABŞ-ın 41-ci prezidenti olan ata Buş öz vaxtını Texasdakı Hyuston və Maynedəki Kennebunkportda, ata mülkündə keçirir.

Son bir neçə həftədə dörd qadın cənab Buşu fotosessiya zamanı onları əlləşdirməkdə ittiham edib. Keçmiş prezidentin sözçüsü ilkin ittihamlardan dərhal sonra qadınlardan üzr istəyib.

Bu ilin əvvəllərində cənab Buşun 2016-cı il seçkisində demokrat Hillari Klintona səs verdiyi barədə xəbər yayılmışdı. Deyilənlərə görə o, Donald Trampı «ədabaz» adlandırıb.

O, həmçinin oğlu Corc Buşla (George W. Bush) birlikdə Şarlottesvildə baş vermiş zorakılıqları kəskin tənqid etmişdi.

Təhlilçilər bunu zorakılıqların tənqidindən yan keçmək istəyən Trampa etiraz nümayişi kimi qiymətləndirmişdilər.

Cənab Bush hazırda siyasi fəallığını davam etdirir. Onun şəxsi «Twitter» hesabı var və ara-sıra müəyyən tədbirlərdə iştirak edən keçmiş prezidentlərə qoşulur.