vaxtlı-vaxtında oxuyun! Bazar, 21 aprel 2019
1 ABŞ dolları 1 USD = 1.7 AZN
1 Avro 1 EUR = 1.928 AZN
1 Rusiya rublu 1 RUB = 0.0258 AZN
1 İngiltərə funt sterlinqi 1 GBP = 2.2014 AZN
1 Türkiyə lirəsi 1 TRY = 0.3228 AZN
Əli bəy Hüseynzadə (1864 - 1940)

«Hürriyyət!.. O nə qüvvədir ki, zehinləri, fikirləri, xəyalları, bəşərin bütün ruh və mənəviyyatını sövq edir!»

Əli bəy Hüseynzadə (1864 - 1940)
MUSİQİ  
12:53 | 25 yanvar 2019 | Cümə Məqaləyə 474 dəfə baxılıb Şriftin ölçüsü Xəbərin şriftini kiçilt Xəbərin şriftini böyüt

“Zirvəyə doğru”

Təbrizli və bakılı musiqiçilərin birgə yaradıcılıq məhsulu

Təbrizin “Barış” etno-rok musiqi qrupunun solisti və rəhbəri Məsud Barış bəstəkar Tural Məmmədli ilə birgə ərsəyə gətirdiyi “Zirvəyə doğru” diskinin təqdimatı ilə bağlı Bakıya gəlib.

Yanvarın 24-də təqdimatı keçirilən diskə 11 mahnı daxil edilib. Hər iki müəllifin bəstələrinin yer aldığı diskdəki ifalar Məsud Barışa məxsusdur.

Birgə albomdan bəhs edən Məsud Barış AZƏRTAC-a müsahibəsində deyib: “Əsasən vokal ifaçısı kimi tanınsam da, Tural Məmmədlinin bəstələri çox xoşuma gəldi. İnanıram ki, diskdə yer alan mahnılar dinləyicilərin ürəyincə olacaq”.

Bakıda bir neçə dəfə musiqisevərlər qarşısında çıxış etdiyini söyləyən soydaşımız burada təhsil almasından da danışıb: “Bakıya gəlişim adi bir təsadüf nəticəsində baş verdi. İllər öncə Azərbaycanın görkəmli vokal ustası Lütfiyar İmanov Təbrizdə konsert verərkən səhnəni yerli ifaçılarla bölüşürdü. O, çox ifaçını dinləsə də, mənə üstünlük verərək dedi: “Sən mənin gəncliyimi xatırladırsan”.

Onunla birgə konsert verdik. Lütfiyar müəllimin dəvəti ilə ilk dəfə Bakıya gəldim, burada bir il ondan sənətin sirlərini öyrəndim”.

Görkəmli vokalçının vəfatından çox kədərləndiyini deyən Məsud Barış onunla başladığı işi yarımçıq qoymayacağına və vokal sənətinə tam yiyələnəcəyinə söz verib: “Elə bu istəklə də Bakıda Azərbaycan Dövlət Konservatoriyasında klassik vokal sənəti üzrə təhsil aldım, görkəmli pedaqoqlardan dərs alaraq sənətin sirlərinə yiyələndim. Əlbəttə ki, yüksək təhsil görmədən peşəkar səviyyəyə yüksəlmək mümkünsüzdür. Başda dahi Üzeyir Hacıbəyli olmaqla, demək olar ki, bütün klassik bəstəkarların yaradıcılığından bəhrələnməyə çalışıram. Xüsusilə, Qara Qarayevin yaradıcılığını özüm üçün təməl hesab edirəm. Bəlkə də bunun nəticəsidir ki, yaradıcılığımda digər janrlarla yanaşı, klassik əsərlər də mühüm yer tutur”.

“Mən klassik musiqi təhsili almışam. Amma cəmiyyətdə pop və rok musiqisi çox sevilir. Çalışıram ki, klassik rokun sintezindən elə bir musiqi yaransın ki, həm gənclərin zövqünü oxşasın, həm də milli üslubu insanlara çatdıra bilək”,- deyə o vurğulayıb.

Təbrizdə rəhbərlik etdiyi musiqi məktəbində 300-dən çox şagirdin təhsil aldığını söyləyən musiqiçi deyib: “İranda musiqi təhsili almağa böyük maraq var. Məktəbdə gənclərlə yanaşı, yuxarı yaşda olan tələbələr də var. Klassik, eləcə də Azərbaycan və İran musiqisini təxminən 30 müəllim tədris edir. Pedaqoqların əksəriyyətinin peşəkar musiqiçilər olması gələcəkdə tələbələrin arasından çoxlu istedadlar yetişəcəyinə ümid yaradır”.

Məsud Barış bədii rəhbəri olduğu “Barış” etno-rok musiqi qrupu barədə də məlumat verib. Qrup təkcə İranda deyil, Azərbaycan, Türkiyə və Mərkəzi Asiya ölkələrində də populyarlıq qazanıb. O, ABŞ-da, Virciniya ştatında və San-Fransiskoda da konsert proqramı ilə çıxış edib. Qrupun Türkiyənin Ankara, İstanbul və digər şəhərlərində konsertləri nəzərdə tutulur.

Ümumilikdə 50-dən çox əsərin müəllifi olan Məsud Barışın musiqi albomlarına həm simfonik, həm də simli orkestr, tamaşa, simli kvartet, ansambllar, solo alətlər üçün əsər və mahnılar daxildir. Bəstələri Bakıda “Gəncliyin səsi” incəsənət festivalında, ABŞ-ın Texas ştatında, eləcə də Vyana, Budapeşt, Moskva, İstanbul, Tehran və digər şəhərlərdə səslənib.

Təqdimatı keçiriləcək diskin müəlliflərindən biri Tural Məmmədli musiqilərin ölkəmizdə diskə yazıldığını və bədii rəhbəri olduğu “Etno-klass” instrumental ansamblının istedadlı musiqiçilərinin müşayiəti ilə ərsəyə gəldiyini söyləyib. O deyib: “Biz birgə yaradıcılıq məhsulu olan əsərləri geniş musiqisevərlər auditoriyasına təqdim etmək istəyirik. Hazırda növbəti albom üzərində işləyirik. Həmçinin Bakıda tamam yeni və orijinal formatda konsert verməyi düşünürük”.

Qeyd edək ki, Tural Məmmədli ilə Məsud Barışın daha bir uğurlu layihəsi Təbrizin 2018-ci il “İslam ölkələrinin turizm paytaxtı” seçilməsindən sonra həyata keçib. Təbrizdə keçirilən təntənəli açılış mərasimində səslənən himnin müəllifi Tural Məmmədli olub.


   

şərhləri göstər

DİQQƏT!

Əziz oxucular. Mövzudan kənar, müəllifin şəxsinə və təhqir sözlər olan şərhlər yolverilməzdir. Sadaladıqlarımızdan savayı bütün fikirləriniz bizim üçün dəyərlidir.

Hələlik rəy yoxdur.

Şərh əlavə etmək

* Daxil edilməsi vacibdir
(göstərilməyəcək)
 
Smile Sad Huh Laugh Mad Tongue Crying Grin Wink Scared Cool Sleep Blush Unsure Shocked
 
1000 ədəd
 
Yeni şərhlər barədə mənim email ünvanıma məlumat göndər.
 
Mənim blankımdakı məlumatları bu kompüterin yaddaşında saxla.
 
Mən şərtləri. oxuyub tanış olmuşam və qəbul edirəm *