«Təhsil Nazirliyi dərslik müəlliflərinin seçimində səlahiyyətli deyil. Hazırda dərsliklərin hazırlanması müsabiqə yolu ilə həyata keçirilir». Bunu lent.az-a açıqlamasında Təhsil Nazirliyinin Tədris resursları şöbəsinin müdir müavini Əsgər Quliyev deyib.

O qeyd edib ki, bəzən dərslik yazılması işinə yaxın gələn olmur: «Məsələn, bu il fransız dili dərsliyi müəlliflərin nəşriyyata gec cəlb olunmasından tender komissiyasına vaxtında cəlb edilə bilmədi. Bu mənada nazirlik hesab edir ki, ehtiyat vasitə kimi gələcəkdə nazirliyə vacib dərsliklərə əvvəlcədən sifariş vermək səlahiyyəti verilməlidir. Sabah əgər müsabiqəyə, Tender Komissiyasına heç bir iş təqdim olunmasa, həmin ehtiyat dərslikdən variant kimi istifadə edilsin. Bu istiqamətdə işlər gedir. Türkiyədə dərsliklərin bir hissəsi dövlətin sifarişi ilə yazılan dərsliklərdir, onlar dövlət dərslikləri kimi qeyd olunur. Digər dərsliklər isə özəl şirkətlər tərəfindən müsabiqə yolu ilə yazılır. Hər ikisi dövlətin hazırladığı standart və altstandarlar əsasında yazılır».

Şöbə müdirinin müavini vurğulayıb ki, müəllif seçməyə nazirliyin səlahiyyəti yoxdur: «Nazirlik yalnız elanı verir, nəşriyyatlar özü elanı tapır. Müəllifin də adı gizli saxlanılır. Əgər o, qalib elan olunursa, ondan sonra nəşriyyat tərəfindən həmin müəllifin adı açıqlanır». Ə. Quliyev vurğulayıb ki, Təhsil Nazirliyi hər zaman dərsliyin keyfiyyətinin yüksək olmasına çalışır: «Bu istiqamətdə iş aparırıq».