Regiondakı sünni ərəb azlıqlarının müstəqilliyini hədəfləyən təşkilat İran rejimi tərəfindən «terrorçu» kimi səciyyələndirilir.
Haaqa polisi çərşənbə axşamı Jan van Ribek küçəsində meydana gələn sui-qəsd nəticəsində öldürülən şəxsin ASMLA lideri Nissi olduğunu açıqlayıb.
Baş verən hadisədən sonra davranışları ilə şübhə doğuran bir nəfər həbs olunub.
Niderland televiziyasına (NOS) müsahibə verən bəzi şahidlər sui-qəsddə İran rejimini ittiham edib.
Şahidlərdən biri Nissinin daha əvvəllər də öldürülməsinə cəhd edildiyi fikrini irəli sürüb.
Aİ-nın «terror təşkilatları» siyahısında deyil
Niderland vətəndaşı olan Nissi 10 ildir ki, Haaqada yaşayırdı. Nissi ötən il lideri olduğu təşkilatı Haaqa Ticarət Palatasında qeydiyyatdan keçirmişdi.
Ticarət Palatasının sənədlərində təşkilatın «Xuzistanda müstəqil və demokratik bir ərəb cümhuriyyəti qurmaq üçün İranın işğalına qarşı müstəqillik mübarizəsi apardığı» bildirilir.
Nissinin lideri olduğu ASMLA 1999-cu ildə təsis edilib. İran hökuməti tərəfindən «terror təşkilatı» kimi səciyyələndirilən hərəkat Xuzistandakı silahlı hücumlarda ittiham edilir. Xuzistanda sonuncu dəfə hücumlar bu ilin əvvəlində həyata keçirilib. ASMLA iki boru kəmərini ələ keçirdiyini açıqlamışdı. Amma İran hökuməti bu açıqlamanı təkzib etmişdi.
ASMLA Avropa İttifaqının (Aİ) «terror təşkilatları» siyahısında yoxdur. Buna görə də təşkilat Niderlanddakı fəaliyyətini qanuni olaraq davam etdirir.
Təşkilat İranın İraq sərhədində yerləşən Ahvaz şəhərindəki sünni ərəb azlıqlarının yoxsulluq içində yaşadığını müdafiə edərək İrandan ayrılmaq istəyir.