“Bazardakı bolluqla əlaqədar yaxın vaxtlarda neftin qiymətlərinin bərpasını gözləməyin mənası yoxdur”. Bunu Rusiyanın energetika naziri Aleksandr Novak “Enerqetiçeskaya politika” jurnalındakı yazısında qeyd edib. O bildirib ki, qiymət artımı iki amildən asılıdır: dünya iqtisadiyyatının bərpa sürətindən və dolu anbarların boşalmağa başlamasından: “Bazarda tarazlıq ilin ikinci yarısından etibarən – məhdudiyyətlərin götürülməsi və OPEC+ anlaşması sayəsində enhtiyatların azalmağa başlamasından sonra neftə tələbatın artması ilə yarana bilər”.
A.Novak qeyd edib ki, anlaşmanın effektivliyi dünya iqtisadiyyatının böhrandan sonra bərpasının başlayıb-başlamayacağından asılı olacaq: “Bununla əlaqədar biz tədricən iqtisadi aktivliyi artıran Çinə nikbinliklə baxırıq. Ümid edirik ki, bir neçə ay ərzində digər ölkələrin iqtisadiyyatlarında da müsbət dinamika görəcəyik”.
Qeyd edək ki, hazırda neftin 2 ay sonrakı fyuçers (müqavilə) qiymətləri 20-21 dollar arasındadır. Gündəlik ticarətin aparıldığı fiziki bazarda qiymətlər isə bundan ucuzdur. Məsələn, Azərbaycan neftinin qiyməti ötən gün 18,60 dollar olub.
çap et