Vaxt.Az

Sözümüz budur ki...


 

...millətin enerjisini mənasız mübahisələrinizə xərcləməyin

Sözümüz budur ki... Bizi məşğul edirlər. Məsələn tarixlə: Nə qədər uzağa getdikcə o qədər şanlı və təbii, o qədər də şirin. Beləcə başımızı girələyirik.

Keçmişin şirinliyi bizi əridir, kiçildir, yox edir.

Keçmişlə, köklə, tarixlə, sənət-şerlə maraqlanmaq qəbahət deyil.

Amma bu məşğuliyyət sənin bütün saatını, gününü və hətta bütün həyatını zəbt edirsə, bax bu qəbahətdir.

Başımızı qatırlar ki, Nuru paşa oradan gəldi, filankəs burdan getdi. O pis gəldi, bu yaxşı getdi. O bizi satdı, bu sadiq oldu.

Biri çıxır nəyisə mədh edir, digəri pisləyir. Və ən əsası da bu iki tərəf enerjilərini başqa yöndə xərcləməlidirlər, xərcləməyə borcludurlar, amma yanlış yollarda yanlış istiqamətə gedir və arxalarında da müəyyən kütləni çəkib aparırlar, insanların enerjisini amansızca öz mənasız mübahisələrinə xərcləyirlər. Dərk etmək lazımdır ki, bu xərclənən xalqın, millətin enerjisidir.

Amma siz kütləni aldada bilərsiniz, hamını yox. Dövr saz-söz, şanlı tarix dövrü deyil... 125 deputatın 25-i hüquqşünas, 50-i iqtisadçı, elə bir o qədəri də müxtəlif sahələrdən təcrübəli idarəçilər (o sahələrin sadəcə mütəxəssisləri yox, təcrübəli idarəçiləri) olmalı olduğu halda, bunlar nələri müzakirə edib, nələrə enerji sərf edirlər.

Eynilə digər dövlət qurumlarını özəl sektordan peşəkar CEO-lar (artıq nəyimiz varsa, əlimizdə olanımızdan) formalaşdırmalıdır, formalaşdırılmada ən azından ciddi payları olmalıdır.

Xeyli adam var, nə gözü dövlətin pulundadır, nə malındadır. Amma bu gün məmnuniyyətlə bu ölkədə nəyinsə qulpundan yapışıb, hardansa başlayıb düzəltmək istəyər.

Düzlərimiz çox olacaq, buna inanırıq deyə zatən iddialıyıq, amma çox güman ki, səhvlərimiz də olacaq. Amma bu səhvlər dövlətin malına, xalqın etimadına xəyanət etmək olmayacaq. Məntiqsiz və xaotik bir şəkildə sağa-sola vurnuxmayacağıq.

...Və şübhəsiz ki, bizlər yüzlərləyik...

 





15.02.2017    çap et  çap et