ABŞ və Rusiya Baş qərargahlarının rəisləri Bakıdakı (Azərbaycan) görüşdə gərginliyin azalması və riskli hadisələrin yaranmasının qarşısının alınması üçün birgə tədbirlərin görülməsi üzrə razılığa gəliblər.

Virtualaz.org-un məlumatına görə, bu barədə Rusiya Federasiyasının Müdafiə Nazirliyi məlumat yayıb.

«Hərbi fəaliyyətin təhlükəsizliyinin artırılması, gərginliyin və riskli hadisələrin yaranmasının azalması üzrə birgə işin istiqamətləri müəyyən edilib», - deyə cümə axşamı «İnterfaks-AVN»ə daxil olan xəbərdə vurğulanıb.

Rusiya Federasiyası Silahlı Qüvvələri Baş Qərargahının rəisi, ordu generalı Valeri Qerasimov və ABŞ Silahlı Qüvvələrinin qərargah rəisləri Komitəsinin sədri, general Cozef Danford Rusiya-Amerika münasibətlərinin cari vəziyyəti, həmçinin Avropada, Yaxın Şərqdə, Şimali Afrikada və dünyanın başqa əsas regionlarında beynəlxalq təhlükəsizlik sahəsində vəziyyətin qiymətləndirilməsi barədə fikir mübadiləsi aparıblar.

***

17:07

Rusiya Müdafiə Nazirliyindəki mənbə «Vedemosti»yə təsdiqləyib ki, Bakıda generallar Valeri Gerasimovla Cozef Danford arasında danışıqlar hazırda davam edir.

Mənbə bildirib ki, danışıqlarda «əvvəlcədən razılaşdırılmış məsələlər-Rusiya və ABŞ arasında hərbi sahədə əlaqələrin cari vəziyyəti, tərəflərin hərbi fəaliyyəti ilə əlaqəli insidentlərin qarşısının alınması» müzakirə olunur. Habelə danışıqlarda dünyanın böhranlı nöqtələrində təhlükəsizlik sahəsində fikir mübadiləsinin aparılması nəzərdə tutulur.

Müdafiə Nazirliyinə yaxın mənbə deyib ki, danışıqlar üçün Bakının seçilməsi təsadüfi deyil. Çünki Danford hazırda Yaxın Şərq regionuna səfərə çıxıb , Azərbaycan isə həm Rusiya, həm ABŞ-la hərbi sahədə yaxın münasibətlər saxlayır.

***

15:52

Azərbaycanın müdafiə naziri general-polkovnik Zakir Həsənov Rusiya müdafiə nazirinin birinci müavini, Silahlı Qüvvələrin Baş Qərargah rəisi ordu generalı Valeri Gerasimovun rəhbərlik etdiyi nümayəndə heyəti ilə görüşüb.

Müdafiə Nazirliyinin mətbuat xidmətindən verilən məlumata görə, müdafiə naziri iki ölkə arasında əməkdaşlığın dostluq münasibətləri və qarşılıqlı inam üzərində qurulduğunu və bu əlaqələrin daim inkişaf etdiyini qeyd edib.

Bölgədəki hərbi-siyasi vəziyyətə toxunan general-polkovnik Z.Həsənov Dağlıq Qarabağ probleminin regional sabitliyə əsas təhlükə yaratdığını və münaqişənin beynəlxalq hüquq normaları çərçivəsində həllinə nail olunmasının vacibliyini vurğulayıb.

Ordu generalı V.Gerasimov da əlaqələrimizin tarixi köklərə əsaslandığını, Rusiyanın Azərbaycanın vacib tərəfdaşı olduğunu qeyd edərək yüksək hərbi nümayəndələrin qarşılıqlı görüşlərinin təşkili və keçirilməsinin ikitərəfli münasibətlərin, eləcə də hərbi və hərbi-texniki sahədə əməkdaşlığın genişlənməsi baxımından zəruriliyini bir daha qeyd edib.

«Beynəlxalq Ordu Oyunları-2017» yarışları çərçivəsində keçiriləcək «Dəniz Kuboku-2017» müsabiqəsinin təşkilində və bilavasitə iştiraka görə Azərbaycana təşəkkürünü bildirən qonaq bu cür tədbirlərin keçirilməsinin iştirakçı ölkələrin silahlı qüvvələrinin şəxsi heyətinin döyüş hazırlığının artırılması, təcrübə mübadiləsi və hərbi qulluqçular arasında dostluq münasibətlərinin yaranmasına xidmət etdiyini diqqətə çatdırıb.

Sonra tərəflər hərbi sahədə əməkdaşlığın mövcud vəziyyəti, hərbi-texniki, hərbi təhsil və hərbi tibb sahələrində əlaqələrin inkişaf perspektivlərini müzakirə edib və qarşılıqlı maraq doğuran digər regional məsələlər ətrafında fikir mübadiləsi aparıblar.

Sonda V.Gerasimov ABŞ Silahlı Qüvvələrinin Qərargah Rəislərinin Birləşmiş Komitəsinin sədri general Cozef Danfordla ikitərəfli görüşün Bakıda təşkil edilməsi və yüksək qonaqpərvərliyə görə Azərbaycan dövlətinin rəhbərliyinə dərin minnətdarlığını bildirib.

***

15:45

«Rossia Today» telekanalı bu dəqiqələrdə xəbər verib ki, Rusiya Silahlı Qüvvələrinin Baş qərargah rəisi, ordu generalı Valeri Gerasimov Bakıya səfərə gəlib.

Qeyd olunur ki, Gerasimov Azərbaycan müdafiə naziri Zakir Həsənovla və Baş qərargah rəisi Nəcməddin Sadıqovla görüşüb. Görüşdə iki ölkə hərbi nazirlikləri arasında əməkdaşlığın cari vəziyyəti və perspektivləri müzakirə olunub. Lakin telekanal general Gerasimovla onun amerikalı həmkarı Danford arasında görüşün başladığına dair heç nə bildirmir.

***

15:20

Bakıda ABŞ və Rusiya Silahlı Qüvvələrinin Baş Qərargah rəisləri arasında görüş başladı.

***

13:43

Rusiya Silahlı Qüvvələrinin Baş qərargah rəisi, ordu generalı Valeri Gerasimovla ABŞ Silahlı Qüvvələrinin qərargah rəisləri komitəsinin sədri, general Cozef Danfordun Bakıda nəzərdə tutulan görüşü hələ başlamayıb.

Virtualaz.org xəbər verir ki, general Gerasimov hələ Bakıya gəlməyib. Hərçənd onun amerikalı həmkarı səhər saatlarından Bakıdadır və prezident İlham Əliyevlə görüşüb.

Generalların görüşünün Bakıda hansı saata təyin olunduğu haqda məlumat yoxdur, ancaq rəsmi protokola bələd olan mənbələr deyirlər ki, görüşün ABŞ ordu komandanının Bakıya gəlişindən etibarən bu qədər gecikməsi normal görünmür. Böyük ehtimalla general Gerasimov öz liderinin-prezident Putinin taktikasına əl atıb və tərəfdaşını gözləməyə məcbur edir.