İran xəbər agentliklərinin verdiyi məlumata görə, Ərdəbil vilayəti telekanalının ən çox izlənilən proqramı olan türkcə xəbər proqramının yayımdan çıxarılması əhalinin geniş etirazına səbəb olub. Bir çox yerli internet qəzeti və Fars xəbər agentliyi bu barədə məlumat yayıb.Yerli jurnalist Məhəmməd Əsgərinin «Fars» üçün hazırladığı reportajda belə yazılır:
«Türkcə olduğu üçün əhali tərəfindən ən çox izlənilən və hər axşam saat 5-də yayımlanan xəbər proqramı məlum olmayan səbəblər üzündən bir müddətdir yayımdan çıxarılıb. Buna etiraz edən ərdəbilli vətəndaşlar vilayət telekanalı rəhbərliyindən açıqlama tələb edirlər.»
Xəbər agentliyi həmçinin yerli kanalda «düzgün türkcə yerinə 99 faiz sözlərinin farsca olduğu və sadəcə fellərin türkcə olduğu bir dil»dən istifadə edilməsinə etiraz olaraq Ərdəbil valisinin ötən aylarda ifadə etdiyi sözlərinə də yer verib.
Hətta molla rejimini dəstəkləyən bəzi siyasətçilər də Güney Azərbaycanın müxtəlif vilayətlərində yerli kanallarda türk dilində proqramların olmamasına etiraz edirlər. Onların dediyinə görə, bu problemlər əhalinin başqa ölkələrin, xüsusilə Türkiyə kanallarına diqqət göstərməsinə yol verir.
çap et