«Xan»ın qəhrəmanı

Vaxt.az bu barədə çox maraqlı bir məlumat əldə edib. Mənbəmiz and-aman edir ki, Fuad Qəhrəmanlının qardaşı «İcraçı Kredit Təşkilatı» MMC-nin (Bank olmayan kredit təşkilatı) Naxçıvan şəhərindəki nümayəndəsi Ağamməd Quliyevin müavini vəzifəsində işləyir. Polad Qəhrəmanlı müavin olmasına baxmayaraq, təşkilatdakı bütün vacib, o cümlədən pulla bağlı məsələlərə şəxsən özü nəzarət edir. Məlumatda o da bildirilir ki, Polad Qəhrəmanlının adı Vasif Talıbova yaxın və etibarlı adamların sırasında çəkilir. «Xan»ın pullarının böyük bir qismi AXCP sədri müavinin yaxın qohumunun əlindən gəlib keçir. Deyilənə görə, aprel mitinqlərində Fuad Qəhrəmanlının həbs olunmasının qarşısını alan da qardaşı Poladdır.

Mənbəmiz onu da xatırlatdı ki, hələ bir müddət əvvəl «Azadlıq»ın keçmiş əməkdaşı, indi xaricdə siyasi mühacir həyatı yaşayan Mirzə Sakit AXCP-ni onun adına göndərilən pulun mənimsənməkdə ittiham etmiş və bununla bağlı bir neçə dəfə kəskin açıqlamalar vermişdi. Bu açıqlamaların birində satirik şair həbsdə olarkən «Sərhədsiz reportyorlar»ın ona ayırdığı iri həcmdə yardımın məhz Fuad Qəhrəmanlı tərəfindən mənimsənildiyini iddia etmişdi. M.Sakit AXCP sədrinin müavinin bu pula xarici markalı maşın aldığını da demişdi. Fuad Qəhrəmanlı isə bu iddianı təkzib edərək «o maşını mənə qardaşım alıb» cavabını vermişdi. Həmin hadisələri xatırlayanda deyilənlər məlumatın doğruluğuna inanmağa əsas verir.

Digər tərəfdən Fuad Qəhrəmanlının hakimiyyət nümayəndələri ilə ailə bağlılığı bununla bitmir. Belə ki, AXCP sədrinin qayınatasının qardaşı sabiq millət vəkili, Daşkəsən rayon icra başçısı Əhəd Abıyevdir.