Mehman Əliyevi prezidentə müraciət etməsinə görə qınayanları anlamaq olmur. Biz Ayda yox, Azərbaycanda yaşayırıqsa, bu ölkənin reallıqlarını görməzdən gəlmək olmaz. Bu ölkədə məhkəmələr tanınmış adamlarla bağlı müstəqil qərar vermək iqtidarında heç vaxt olmayıb, heç indi də elə gücdə deyil. İkincisi, Mehman Əliyev kimi adamları «ayı xidməti» göstərmək üçün prezidentdən xəbərsiz tuta bilərlər, amma onların azadlığa buraxılmaları xəbərsiz olmur. O başqa məsələ ki, onu niyə tutmuşdular, bu həbs kimə və nəyə lazım idi. Bu sualın cavabını bəlkə heç Mehman Əliyevin özü də bilməyəcək heç vaxt. Üçüncüsü, Mehman Əliyev prezidentə müraciət etməyib illərlə həbsdə qalacaqdı tutaq ki - bu, Azərbaycan cəmiyyətinə və dövlətinə nə verəcəkdi? Özümüzü aldatmayaq - bu xalq artıq 1988-1992-ci illərin xalqı deyil ki, onun uğrunda illərlə həbsdə yatasan. Kimsə dediklərimlə razı deyilsə, Rəşadət Axundovun həbsdən çıxandan sonra «Yeni Müsavat»a verdiyi məşhur müsahibəsini tapıb oxusun. Biz xalq olaraq Molla Nəsrəddinin fil lətifəsindəki toplumuq - Şahın sarayına çatanda mollanı tək qoyub aradan çıxırıq həmişə. Oxuyun!
***
Deyirlər, Əmir Teymur ordusunda fil də saxlayırmış. Filləri ayrı-ayrı kəndlərə göndərirmiş ki, orada saxlasınlar. Fillərdən birini də Molla Nəsrəddin olan kəndə göndərir. Teymurləngin qorxusundan kimsə filə toxunmur. Fil kefi nə istəyir eləyir, əkin-zəmini, bağ-bağatı, bostanı yeyib tələf edir. Kəndlilər filin əlindən lap təngə gəlirlər. Onlar yığılıb mollanın yanına gəlirlər:
- A molla, bu fil bizdə istahat qoymadı, gəl qabağa düş. Əmirin yanına gedək, dərdimizi ona deyək, bəlkə bir rəhmi gəldi, fili apardı.
Molla razı olur. Onlar Teymurləngin yanına yola düşürlər. Yolda kəndlilər Əmir Teymurun qorxusundan ikibir-üçbir qaçıb dağılırlar. Əmirin qapısına çatanda molla baxır ki, hamı qaçıb, təkcə özü qalıb, öz-özünə deyir:
- Yaxşı, görün sizin başınıza nə oyun gətirəcəyəm. Əmir Teymur ondan soruşur:
- Molla, niyə gəlibsən?
Molla deyir:
- Əmir sağ olsun, bizim kəndə bir fil qonaq göndərmisən. Bundan çox razıyıq. Ancaq fil tək olduğundan səs-küyündən dayana bilmirik. Kəndlilər də mənimlə gəlmişdilər, cəsarət eləyib içəri girmədilər. Xahiş edirik, bir fil də göndərəsən.
Əmir Teymurun mollanın sözündən xoşu gəlir, ona çoxlu ənam verdirir. Əmr eləyir ki, o kəndə bir fil də göndərsinlər.
çap et