Rusiya «Facebook»u qadağan edə bilər

Jarovun sosial şəbəkədəki «hərarət»dən narahatdır

Rusiyanın Federal Kommunikasiyalar Agentliyinin başçısı Aleksandr Jarov Rusiya xəbər agentliklərinə deyib ki, hökumət «Facebook»u Rusiya qanunlarına uyğun fəaliyyət göstərməyə məcbur edəcək. Bu qanunlar Rusiyada iş görən xarici şirkətlərdən məlumat bazasını Rusiya ərazisində yerləşdirməyi tələb edir.

Tənqidçilər 2015-ci ildə qüvvəyə minmiş bu qanunu pisləyərək bildirirlər ki, o, həssas məlumatın potensial baxımdan Rusiya xüsusi xidmətlərinə açılması təhlükəsi yaradır.

Jarov deyib ki, Rusiya hökuməti bir «unikal xidmət» olaraq «Facebook»un narahatlıqlarını başa düşür, lakin onun üçün heç bir istisna edilməyəcək və əgər «Facebook» qanuna əməl etməsə, ona giriş gələn ildən bloklanacaq.

Ötən il Rusiya məhkəməsi eyni səbəbdən «Linkedln»i bloklayıb. İndi Rusiya istifadəçiləri bu platformaya yalnız proksi serverləri vasitəsilə girə bilirlər.

Lakin son vaxtlar İnternet azadlığı üzərinə basqılarını artıran Rusiya iyul ayında virtual şəxsi şəbəkələri (virtual private networks - VPN) və başqa vasitəçi proksi xidmətlərinin qadağanı haqda qanun qəbul edib. Rusiya internet azadlığı üzərinə basqıları ölkənin ekstremizmin yayılmasından narahatlığı ilə izah edir.

Hazırda ruslar qadağan edilmiş saytlara məhz belə xidmətlər vasitəsilə daxil olurlar.

Rusiya vətəndaşlarına aid şəxsi məlumatların Rusiyadakı serverlərdə saxlanmasını tələb edən qanun qəbul olunduğu vaxtdan bəri ayrı-ayrı şirkətlərə seçkili qaydada tətbiq olunub.

Rusiyanın internet azadlığı fəalları beynəlxalq texnologiya şirkətlərini Rusiya hökumətinin tələbini rədd etməyə çağırırlar. Onlar bildirirlər ki, əks halda milyonlarla rusiyalı istifadəçinin kibertəhlükəsizliyinə hədə yaranacaq.

Rusiya Dövlət Dumasındakı kommunikasiya və informasiya siyasəti komissiyasının başçısı Leonid Levin məsələnin «Facebook»un bağlanacağı həddə çatmayacağına ümid etdiyini bildirib. O deyib ki, bu məsələnin həlli istiqamətində ABŞ şirkəti ilə danışıqlar aparılacaq.