Azad Suriya Ordusu (ASO) Suriyanın İdlib vilayətinə girib, döyüşlər gedir. APA TV-nin məlumatına görə, Türkiyə ilə Rusiya İdlibə nəzarət edəcək qüvvələrlə bağlı razılıq əldə etdikdən sonra Türkiyə Silahlı Qüvvələri bölgəyə hərbi müdaxilə hazırlıqlarını tamamlayıb.
Türkiyənin dəstəklədiyi Azad Suriya Ordusuna bağlı «Həmzə bölüyü» «Fərat Qalxanı» əməliyyatı nəticəsində İŞİD-dən təmizlənən Suriyanın şimal torpaqlarından Türkiyəyə daxil olaraq Hatay vilayətinə gəlib. Burdan isə Bab-ı Hav sərhəd qapısından Suriyaya keçərək İdlibə doğru yola düşüb. Əməliyyata gedən Azad Suriya Ordusu döyüşçülərinin görüntüləri sosial mediada yayılıb.
Son dəqiqlərdə əldə olunan məlumatlara görə, müxaliflər hazırda İdlibin Kefer Selin və Kefer Tekarim kəndlərində «Şamın Fəthi Cəbhəsi» terrorçuları ilə döyüşür. «Russia Today»ın xəbərinə görə, Türkiyə PUA-ların uçuşlarını artırıb, Rusiya hərbi təyyarələri isə «Şamın Fəthi Cəbhəsi»nə aid silah depolarını vurmaq üçün havaya qalxıb.
Qeyd edək ki, İran, Rusiya və Türkiyənin Qazaxıstan paytaxtında əldə etdiyi razılaşmaya əsasən Suriyada üç təhlükəsizlik bölgəsinin yaradılması nəzərdə tutulub. Rusiya və Türkiyə bu məqsədlə bölgəyə 500 hərbçi göndərəcək. Razılaşmaya əsasən İdlibin daxili Türkiyə, xarici isə Rusiya nəzarətində olacaq. Artıq Türkiyənin canlı qüvvəsi və zirehli texnikası sərhədə yerləşdirilib.
İdlib bölgəsinə hazırda «Şamın Fəthi Cəbhəsi» nəzarət edir. Terrorçu qruplaşmanın təxminən 25 min üzvü olduğu bildirilir. «Şamın Fəthi Cəbhəsi» Dəməşq, İdlib və Hamada həm Əsədə məxsus qoşunlarla, həm də müxaliflərlə döyüşür.
çap et