Azərbaycan Mərkəzi Bankı (AMB) avqust ayı üzrə depozit və kreditlər üzrə orta faiz dərəcəsini açıqlayıb.
«APA-Economics» AMB-nin açıqladığı statistikaya istinadən xəbər verir ki, avqustda manatla depozit və əmanətlər üzrə orta faiz dərəcəsi 9,49 faiz, xarici valyuta ilə 3,57 faiz təşkil edib. İyul ayı ilə avqust ayını müqayisə edəndə məlum olur ki, manatla depozit və əmanətlər üzrə faiz dərəcəsi 0,66 faiz artıb, xarici valyutada depozit və əmanətlər üzrə faiz dərəcəsi 0,08 faiz azalıb. Ümumiyyətlə, manatla depozit və əmanətlərdə orta faiz illik 8,55 faizdən 9,49 faizə yüksəlib, xarici valyutada 4,97 faizdən 3,57 faizə enib.
Avqust ayında hüquqi şəxslərdən manatla depozitlər ortalama 4,84 faiz, xarici valyutada isə 2,78 faizdən cəlb edilib. Hesabat ayında fiziki şəxslərdən manatla cəlb edilmiş depozitlərinin orta faizi 11,72 faiz, xarici valyutada isə 4,20 faiz olub.
Avqustda verilmiş kreditlər üzrə orta faiz dərəcəsinə gəlincə, bu göstərici manatla 13 faiz, xarici valyuta ilə 10,62 faiz təşkil edib. İyul ayı ilə avqust ayını müqayisə edəndə məlum olur ki, manatla kreditlər üzrə orta faiz dərəcəsi 0,10 faiz, xarici valyutada kreditlər üzrə faiz dərəcəsi 0,62 faiz artıb. Ümumiyyətlə, manatla kreditlərdə orta faiz illik 12,28 faizdən 13 faizə, xarici valyutada 10,21 faizdən 10,62 faizə yüksəlib.
Avqust ayında fiziki şəxslərə verilən kreditin orta faiz dərəcəsi manatda 16,10 faiz xarici valyutada 16,25 faiz olub. Hüquqi şəxslərə sözügedən ayda kreditlər manatda orta hesabla 9,02 faiz, xarici valyutada 7,51 faiz təşkil edib.
çap et