Cəzaya səbəb olan faktlar...

... Varsa, niyə gizlədilir?

AFFA İntizam Komitəsinin qərarına diqqət edək: «Keşlə» Peşəkar Futbol Klubunun AFFA-ya rəsmi müraciətinə, hüquq-mühafizə orqanları tərəfindən təqdim edilmiş məktuba və UEFA-dan daxil olmuş məlumatlara əsasən, iştirakçısı olduğu oyunun idman nəticəsinin manipulyasiyasına görə «Keşlə» Peşəkar Futbol Klubunun futbolçuları - Nizami Hacıyevə və Mirhüseyn Seyidova futbola aid hər bir məşğuliyyət ömürlük qadağan edilsin. Oyunların idman nəticəsinin manipulyasında iştirakı ilə bağlı şübhələrin mövcud olduğu digər futbolçular barədə araşdırma davam etdirilsin. Tərəflər bu qərarı aldıqdan sonra 15 (on beş) gün ərzində AFFA-nın Apellyasiya Arbitraj Tribunalına qərarla bağlı apellyasiya şikayəti verə bilərlər».

«Keşlə»nin müraciəti aydındır, Müşahidə Şurasının sədri Zaur Axundov bu xəyanəti bağışlamayıb, futbolçuların onu qoyub «Neftçi»yə getmək istəməsinin qisasını alır. Bəlkə də qoluzorluluq nümayişidi, amma o, bu bacarığını Səlahət Ağayev eyni yolu gedəndə və ya Rauf Əliyev «Kukesi»yə yollanda göstərə bilməmişdi. Deməli, bu dəfə həqiqətən əldə hansısa faktlar var.

Komitənin qərarında «hüquq-mühafizə orqanları tərəfindən təqdim edilmiş məktub» qeydi də var. Maraqlıdı, dünənə kimi DİN bu fitbolçuların saxlanıldığını təsdiq etmirdi. Bəs, o məktubu nəyə əsaslanıb göndəriblər? Məktub sifarişlə göndərilib, yoxsa sadəcə, futbolçuların saxlanmasını etiraf etmək olmaz?

Suallar çoxdur, AFFA mütləq açıqlama verməli, detalları açıqlamalıdır. Açıqlanmırsa, qərəzli qərar şübhələri davam edəcək. Hətta onları hansı oyunlarda qanun pozuntusu etdikləri də göstərilməli, həmin matçların nəticəsi ləğv olunmalıdır.

AFFA-nın İntizam Komitəsinin sədri Tofiq Fətullayevin dedikləri də heç nəyi dəyişmir: «Futbolçuları iclasa dəvət etməsək belə, sübut olundu ki, Hacıyevlə Seyidov çirkin oyunlarda iştirak ediblər. Bunu əldə olan faktlar da təsdiqlədi. Bu üzdən də onları futboldan ömürlük kənarlaşdırdıq. Onların bu əməlləri nəticəni dəyişdirə bilməz. Cəza yalnız futbolçular şamil olunub. Çirkin oyunların hesabları isə olduğu kimi də qalacaq».

Oyunun nəticəsi çirkindisə, necə qüvvədə qala bilər? Niyə ad çəkilmir? Yoxsa olayların miqyasının böyüməsindən, futbol təsərrüfatındakı idarəçiliyin yarıtmazlığının ifşasından qorxurlar? AFFA-nın yaydığı bəyanat da heç nəyi açmır, gözdən pərdə asmaq üçündü. Amma etiraf edilir ki, söhbət bir oyundan gedir. Hansından?

«Keşlə»nin Müşahidə Şurasının sədri Zaur Axundov isə hələ də hücumdadır. Kimə, nəyə arxayın olduğunu, məqsədini bilmirik, amma konkret danışır, futbolçuların «Neftçi»yə oyun verdiyini bildirir. O zaman matçın nəticəsi niyə ləğv olunmur? Axı, AFFA rəsmiləri iddia edir ki, ortada konkret FAKTLAR var. Fakt varsa, tərəflərdən birinin cəzalandırılması ilə haqq-ədalət yerini tapırmı?

Zənnimizcə, qərar dolğun deyil. Mütləq faktlar açıqlanmalıdır ki, ictimaiyyət də onların nə qədər əsaslı olduğunu görsün. Əks halda, AFFA-nın qərəzli olması, təzyiq və sifarişlə qərar qəbul etməsi haqda fikir formalaşacaq.