OPEK-in istehsalın dondurulması razılaşmasının vaxtını 2019-cu ilin yanvarına qədər uzatması neftin qiymətlərini bahalaşdırmayıb.APA TV-nin məlumatına görə, «Brent» markalı neft dekabrın 1-də 64,29 dollara satılırdısa, hazırda 63,46 dollardan təklif olunur. Qərbi Texas nefti (WTİ) ötən həftənin son satışlarında 58,34 dollardan satılırdı. Bu həftənin ilk seanslarında bu markadan olan neftin bir bareli 57,98 dollara satılır.
OPEK-in anlaşmasına Rusiya, Nigeriya və Liviya da qatılıb. Bundan əvvəlki razılaşmalarda son iki ölkə razılaşmadan kənar saxlanılmışdı. Rusiya isə son həftələrdə bir neçə dəfə istehsalı dondurmağa ehtiyac olmadığını açıqlamışdı. Sonda razılaşma tərəfdarlarının istədiyi kimi imzalandı. Buna baxmayaraq, qiymətlərdə bahalaşma yox, ucuzlaşma qeydə alındı.
Qiymətlərin dəyişməsinə hazırda ABŞ-dan gələn xəbərlər daha çox təsir edir. Bu ölkədə fəal neft quyularının sayı artaraq 749-a çatıb. Bu, sentyabrın sonundan bu yana ən yüksək səviyyədir. Mütəxəssislər Nigeriya və Liviyanın razılaşmaya əlavə olunması ilə OPEK-in əlindəki bütün kartları oynadığını bildirir. «ABŞ-ın qaya nefti istehsalçıları olduğu müddətdə neftin qiymətlərinin bu səviyyədən yüksəlməsi olduqca çətindir» - deyə «Hyundai Futures Corp.» şirkətinin əmtəə analitiki Uill Yun bildirib.
Bunun sadə səbəbi var. Qiymətlər 45-50 dollardan baha olduqca, ABŞ neft hasilatçılarının işi gəlirli olur. Artan istehsal isə qiymətləri düşürür.
çap et