Yeni il bayramına iki gün qalıb. Hər tərəfdə canlanma müşahidə olunur. Kimi bayram bazarlığı edir, kimi ticarət mərkəzlərində hədiyyə axtarışındadır, kimi də paytaxtdan rayona - təzə ili öz evində, doğmaları ilə birlikdə qarşılamaq üçün tələsir. Sözsüz, belə təqvim günlərində ictimai nəqliyyatda, xüsusilə də Bakıdan bölgələrə hərəkət edən avtobuslarda sıxlıq yaranır.
Rayona gedənlər bilet sorağında...
Son iki gündə redaksiyamıza gələn zənglər arasında rayona getmək istəyən vətəndaşların şikayət xarakterli müraciətləri diqqət çəkir. Onlar avtovağzalda bilet tapa bilmədiklərini və bəzən süni qiymət artımı ilə rastlaşdıqlarını iddia edirlər. Bu müraciətləri nəzərə alıb məsələ ilə yaxından tanış olmaq üçün Bakı Beynəlxalq Avtovağzal Kompleksinə yollandıq.
Öncə qeyd edək ki, kompleksin ərazisi həmişəki kimi səliqəli idi. Avtobusların sıra ilə düzülüşü, növbəli hərəkət qrafiki dərhal sezilirdi. Şəhərin digər yerlərində olduğu kimi, burada da bayram əhvali-ruhiyyəsi hiss olunurdu. Eyni zamanda adəti üzrə bayramqabağı olduğuna görə, təhlükəsizlik tədbirləri də yüksək səviyyədə idi, mühafizəçilər çox diribaş görünürdülər...
Nəhayət, kassaya yaxınlaşıb bilet almaq istəyirik. Digər sərnişinlər kimi, biz də «rayona gedirdik». Əvvəlcə kassaların önünə yapışdırılmış kiçik cədvəllər diqqətimizi çəkir, burada bölgələrə gedən avtobusların hərəkət istiqamətləri və aidiyyəti üzrə gediş haqqının dəyəri göstərilib. Qazax avtobuslarına bilet almaq istəyəndə isə 11-ci kassada çalışan xanım yanvarın 2-nə kimi bütün biletlərin satıldığını dedi. Sonra başqa kassaya yaxınlaşıb digər istiqamətlərə biletlərin olub-olmadığı ilə maraqlandıq. Cavab eyni idi: «Biletlər satılıb». Avtobus dayanacağında isə kassada biletləri satılıb qurtaran istiqamətlər üzrə də reyslərdə boş yer tapmaq mümkün idi. Bəzi istiqamətlərdə hətta gediş haqqında da fərq var idi, məsələn, Qazax istiqamətində biletin qiyməti 7,26 manat olduğu halda dayanacaqda gəzişən dəllallar sərnişinlərdən həmin rayona bileti 10 manata təklif edirdilər. Və yaxud da Şəkiyə 5,63 manat bilet qiyməti təyin olunsa da, dəllalın istədiyi məbləğ 7 manat idi.
Kompleks gücləndirilmiş rejimdə işləsə də, işbazlar fəaliyyətdədir
Əlbəttə, belə məqamlarda vəziyyətdən istifadə edib süni şəkildə qiyməti qaldırıb «rahat yolla» gəlir əldə etmək istəyənlər ortaya çıxır. Baxmayaraq ki, xüsusi təqvim günlərində Bakı Beynəlxalq Avtovağzal Kompleksində qiymət intizamına nəzarət komissiyası fəaliyyət göstərir, reysə çıxan avtobuslarda bu kimi halların qarşısını almağa çalışırlar. Amma yenə də dəllallar «fəaliyyətdədirlər». Bəzən insanların hüquqlarını bilməməsindən və mövcud gediş haqlarının dəyəri haqqında məlumatsızlıqlarından məharətlə istifadə edirlər.
Bakı Beynəlxalq Avtovağzal Kompleksinin mətbuat katibi Yaşar İsakov bildirdi ki, Dünya Azərbaycanlılarının Həmrəyliyi Günü və Yeni illə əlaqədar iş qrafikində dəyişiklik edilib. Belə ki, dekabrın 25-dən yanvarın 4-dək Bakı Beynəlxalq Avtovağzalı gücləndirilmiş iş rejimində işləyəcək. («Azərbaycan»)
çap et