“Əsgəri soymaq nə deməkdir?”

Aprel döyüşlərindən sonra Cəbrayılın kəndlərindən birinə atılmış 15 erməni hərbçinin taleyi

Virtualaz.org xəbər verir ki, bu haqda epress.am saytına qrupun tərkibində olan və artıq ordudan tərxis edilmiş əsgərin xalası danışıb. O, adını açıqlamayıb, eləcə də təhlükəsizliyə görə əsgərin kimliyini göstərməyib.

Həmin əsgər Ermənistanın Oktemberyan rayonundan xidmətə çağırılıb, 6 ay sonra Qarabağa, Cəbrayıl-Xocavənd istiqamətindəki hərbi hissələrdən birinə göndərilib. 10 gün sonra isə aprel döyüşləri başlayıb.

Aprelin 2-də bir qrup əsgəri hansısa kəndə aparıb atıblar və orada onlar tərxis olunana qədər saxlanılıb. “Həmin gün onu nə vaxtsa ələ keçirilmiş Azərbaycan kəndinə aparıblar, adını xatırlamıram, o il yarım həmin kənddə qalıb və hərbi hissəyə qayıtmayıb. Çünki hamı inanırdı ki, müharibə başlayacaq. Onlarla birlikdə hansısa kapitan olub. Tanklarda yatıblar, türkün (azərbaycanlı) evinin daşlarını söküb özlərinə evcik qurublar. Bir müddət orada yaşayıblar, çayda çimiblər. Evə qayıdanda deyirdi ki, il yarım ərzində elektrik lampası görməyiblər”, - qadın danışıb.

Əsgərlərin atıldığı kənd hərbi hissədən 3-4 saatlıq məsafədə yerləşirmiş və onların dalınca heç ərzaq da göndərən olmayıb. Əsgərin ailəsi hər ay ona ərzaq bağlaması göndərirmiş, sonra isə əsgər ərzaq almaq üçün ayda 5 min dram pul göndərmələrini istəyib. Pulu kapitanın və hansısa qadının bank hesabına köçürürlərmiş. Əsgərlərə verilən təlimat belə olub ki, kənddə gizlənsinlər və çalışıb ələ keçməsinlər.

Amma əsgər evə qayıdandan sonra hərbi hissə onu tankdan dizel oğurlayıb satmaqda ittiham edib və 15 min dram tələb edib. “Uşaqlar il yarım ərzində nə şəhərə gediblər, nə başqa adam üzü görüblər, heç kim də onların olduğu yerə gedə bilməzdi. Bəs necə olur ki, onlar yanacaq oğurlayıb satıblar. Kimə satıblar? Əsgəri soymaq nə deməkdir axı”, - deyə qadın sual edib.

Əsgərin xalası bu məsələ ilə bağlı “Facebook”da Müdafiə Nazirliyinin mətbuat xidmətinin rəhbəri Artsurun Ovanisyandan soruşmaq istəyib, amma Ovanisyan dostluğunda olmayanlara cavab vermir və əsgərin qohumunun sualı cavabsız qalıb...