Suriya prezidenti Bəşər Əsədin kiçik qardaşı, Mahir Əsəd Dəməşqdə hərbi aerodroma hücum vaxtı yaralanıb. İsrail telekanalı bildirir ki, bu barədə ərəb KİV-i xəbər yayıb.
Xatırladaq ki, ötən gecə Dəməşq ətrafındakı “Mezze” hərbi aerodromunda dalbadal güclü partlayışlar baş verib. Yaxın Şərq KİV-ləri xəbər verir ki, raket zərbələri İsrail aviasiyası tərəfindən endirilib. Suriya hüquq müdafiəçilərinin məlumatına görə, həlak olanlar və yaralananlar var.
Ərəb KİV-i bildirir ki, İsrailin Hərbi Hava Qüvvələrinin hücum hədəflərindən biri də, əvvəllər də dəfələrlə aviazərbələrə məruz qalmış tədqiqat mərkəzi “Cimriyan” olub.
Mahir Əsəd Suriya prezidentinin kiçik qardaşıdır, onu təsir gücünə görə ölkədə ikinci şəxs hesab edirlər. O, Respublika qvardiyasının və 4-cü elit zirehli tank diviziyasının komandanı, briqada generalıdır.
Bununla belə, bir sıra ekspertlər hesab edirlər ki, doğma qardaşlar arasında münasibətlər mürəkkəbdir və tez-tez gərgin xarakter alır.
çap et