“Neft satışlarımızın sıfıra enməsinə icazə verməyəcəyik”. İran mətbuatı bildirir ki, bunu İran Prezidenti Həsən Ruhani paytaxt Tehranda İşçilər Həftəsi münasibətilə təşkil olunan tədbirdə ABŞ sanksiyalarından danışarkən deyib.Ölkəsinin neft satışında israrlı olmaqda davam edəcəyini söyləyən H.Ruhani bildirib: “İran neft ixracını güclü şəkildə davam etdirəcək”.
Birləşmiş Ştatların sanksiyalarının mərhəmətsiz olduğunu deyən İran Prezidenti sanksiyaların birbaşa xalqı hədəf aldığını qeyd edib: “İstər hökumət, istər işəgötürən, işçi, sahibkar və ya fərqli istehsal sektorları olsun, mövcud vəziyyətdə ağır bir yük daşıdığımızın fərqinə varmalıyıq”.
ABŞ-ın İran neftini sıfıra endirməklə bağlı qərarının böyük bir səhv olduğunu bildirən H.Ruhani deyib: “Amerikalılar qarşıdakı aylarda neft ixracını həyata keçirməkdə davam edəcəyimizi görəcəklər. Dövlət olaraq neft ixracını güclü şəkildə davam etdirəcəyik”.
İran Prezidenti bəzi ölkələrin ABŞ-ın təzyiqi qarşısında geri çəkilmələrini tənqid edib.
Qeyd edək ki, Ağ Evin mətbuat xidməti ABŞ Prezidenti Donald Trampın İrandan neftin və neft məhsullarının çatdırılmalarına qoyulmuş embarqonun müddətini uzatdığı barədə məlumat yayıb.
Amerika lideri imzaladığı müvafiq fərmanda əminlik ifadə edərək bildirib ki, bu sahədə İranla əməkdaşlığı dayandırmaq üçün dünyada kifayət qədər neft var.
“Mən bu nəticəyə gəldim ki, dünyada İrandan başqa xarici maliyyə təşkilatları tərəfindən İrandan neftin və neft məhsullarının ixracını əhəmiyyətli dərəcədə ixtisara salmaq üçün digər ölkələrdə də kifayət qədər neft və neft məhsulları istehsal edilir”, - deyə Amerika lideri qeyd edib.
Xatırladaq ki, ABŞ-ın İrana qarşı sanksiyalarının ötən il noyabrın 5-də qüvvəyə minən ikinci mərhələsi çərçivəsində İrandan neft idxalını azaldan 8 ölkəyə - Türkiyə, Çin, Hindistan, Koreya Respublikası, İtaliya, Yunanıstan, Yaponiya və Tayvana 180 günlük müvəqqəti güzəşt tətbiq olunurdu. Həmin güzəştin müddəti mayın 2-də başa çatır.
çap et