Bu gün Bakıda dahi rus şairi Aleksandr Puşkinin anadan olmasının 214-cü ildönümü qeyd olunub. APA-nın məlumatına görə, Puşkinin abidəsi önündə keçirilmiş tədbir Səbail rayon İcra Hakimiyyəti, Rusiyanın Azərbaycandakı səfirliyi və “Sodrujestvo” Cəmiyyəti tərəfindən təşkil olunub.Tədbirin açılışında çıxış edən Səbail rayon Hakimiyyətinin başçısı Asif Əsgərov deyib ki, şairin abidəsi ucaldılmış bu parkda Puşkinin doğum gününün keçirilməsi artıq ənənəyə çevrilib. O, dahi rus şairinin rus dili, ədəbiyyatı və mədəniyyətinin formalaşması və inkişafındakı rolunu, onun dünya ədəbiyyatına verdiyi töhfələri xatırladaraq bildirib ki, Puşkinin əsərləri təkcə rus xalqı tərəfindən deyil, dünyanın bütün xalqları tərəfindən sevilir: “Puşkinin yaradıcılığı insanları yaşına, milliyyətinə, dininə baxmayaraq birləşdirir, onun əsərləri dünyanın müxtəlif dillərinə tərcümə olunub”.
Rusiyanın Azərbaycandakı səfiri Vladimir Doroxin iki ölkə arasında mədəni əlaqələrin möhkəmləndirilməsində Puşkinin doğum günü və digər tədbirlərin rolunun əvəzsiz olduğunu söyləyib. O, Puşkinin Qafqaz haqqında yazdığı şeiri oxuyub.
Sonra Səbail rayon orta məktəblərinin şagirdləri Puşkinin əsərləri əsasında hazırlanmış səhnəciklər göstəriblər.
çap et