Kanada Xarici İşlər Nazirliyi Rusiyaya qarşı əlavə sanksiyalar elan edib. Hökumətin saytında verilən məlumata görə, yeni məhdudlaşdırıcı tədbirlər “Rusiya oliqarxları, onların ailələri və Putin rejiminin yaxın adamları da daxil olmaqla 14 şəxsə” tətbiq edilir.
Sanksiyalara həmçinin dəbdəbəli malların Rusiyaya ixracı və Rusiyadan idxalına qadağa da daxildir. Belə ki, Rusiyaya spirtli içkilər, tütün məmulatları, dəbdəbəli geyim və ayaqqabılar, aksessuarlar, zərgərlik və incəsənət məmulatlarının ixracı qadağan olunur. İdxal qadağası spirtli içkilərə, dəniz məhsullarına, balıqlara və qeyri-sənaye almazlarına təsir edəcək. 2021-ci ildə bu malların dövriyyəsi 75,7 milyon dollar təşkil edib.
Bundan əlavə, Kanada hökuməti Rusiya tərəfindən silah istehsalında istifadə edilə bilən malların ixracını qadağan edəcək.
“Putin rejimi əsassız hərəkətlərinə görə cavab verməlidir və verəcək. Kanada müttəfiqləri ilə birlikdə Rusiya rejimi müharibə aparmaq qabiliyyətini itirənə qədər ona təzyiq göstərmək üçün yorulmadan çalışacaq. Bizim Ukraynaya və Ukrayna xalqına dəstəyimiz sarsılmazdır”, - deyə xarici işlər naziri Melani Coli bildirib.
Hökumətin saytında verilən məlumata görə, Rusiyanın Ukraynaya müdaxiləsindən sonra Kanada Rusiya, Ukrayna və Belarusdan olan 1000-dən çox fiziki və hüquqi şəxsə qarşı sanksiya tətbiq edib.
Aprelin sonunda Kanadanın İcmalar Palatası Rusiyanın hərəkətlərini Ukrayna xalqının soyqırımı kimi tanıyan qətnamə qəbul edib. Sənəddə deyilir ki, Rusiya Ukraynadakı müharibə zamanı “kütləvi vəhşiliklər” və “Ukraynada mülki şəxslərin qəsdən öldürülməsi kimi sistemli hallar” törədib. Daha sonra İcmalar Palatasının üzvü və sənədin müəllifi Hizer Makferson hakimiyyəti Rusiyaya qarşı sanksiyaları sərtləşdirməyə və Ukraynaya humanitar yardımı artırmağa çağırıb.
çap et