Prezident Co Bayden bildirib ki, ABŞ Çinin işğalı halında Tayvanı müdafiə etmək üçün müdaxilə etməyə hazır olacaq. Baydenin son şərhi ABŞ-ın bu mövzuda uzun müddətdir davam edən “strateji qeyri-müəyyənlik” siyasətinə qarşı şübhə yaradır.
Tokioda keçirilən mətbuat konfransında Baydendən ABŞ-ın Rusiyanın Ukraynaya təcavüzündən sonra Vaşinqtonun müdaxilə etmədiyini nəzərə alaraq, “Tayvanı müdafiə etmək üçün hərbi müdaxiləyə” hazır olub-olmadığı soruşulub.
Bu, Baydeni digər ABŞ prezidentlərinin Çinin Tayvana mümkün işğalı haqqında danışarkən qəbul etdikləri “strateji qeyri-müəyyənlik” yanaşmasından uzaqlaşdıran son açıq addımdır.
Çinin Xarici İşlər Nazirliyi buna dərhal cavab verib və Pekinin suverenliyi ilə bağlı məsələlərdə güzəştə yol verilmədiyini bildirib.
Oktyabr ayında Bayden buna oxşar açıqlamalar vermişdi. Hər iki halda Ağ Ev rəsmiləri Baydenin şərhlərini tez bir zamanda aydınlaşdırmağa çalışıb.
“Prezidentin dediyi kimi, bizim siyasətimiz dəyişməyib. O, bizim Vahid Çin Siyasətimizi və Tayvan boğazı boyunca sülh və sabitliyə sadiqliyimizi bir daha təkrarlayıb”, – Ağ Ev rəsmisi bazar ertəsi bildirib.
Lakin, ABŞ rəsmisi Baydenin Tayvanı müdafiə etməsinə dair şərhlərindən geri çəkilməyib.
Təkpartiyalı avtoritar dövlət olan Çin demokratik Tayvanı separatçı əyalət kimi görür və lazım gələrsə, onu zorla geri alacağına çoxdan söz verib. Həmçinin, son illərdə Pekin adanın yaxınlığına artan sayda döyüş təyyarələri göndərib.
Tokioda Bayden Çinin "təhlükə ilə oynadığını" söyləyib, lakin Çinin Tayvanı ələ keçirmək üçün güc tətbiq edəcəyini gözləmir, xüsusən də dünya Rusiyanın Ukraynanı işğalına qarşı durarsa.
“Mən düşünürəm ki, çox şey dünyanın bu cür hərəkətlərin uzunmüddətli bəyənilməməsi ilə nəticələnəcəyini nə qədər aydın göstərməsindən asılıdır”, – Bayden bildirib.
çap et