Dünya Səhiyyə Təşkilatı (DST) Avropa və Şimali Amerikada meymunçiçəyinə yoluxmalara qarşı kütləvi peyvəndləməyə ehtiyac görmür. Qurum inanır ki, yaxşı gigiyena və təhlükəsiz seksual davranış virusun yayılmasını nəzarətə ala bilər. Bunu DST-nin aparıcı rəsmisi deyib.DST rəsmisi Riçard Pebodu mayın 23-də “Reuters”ə müsahibəsində təcili vaksin ehtiyatlarının da nisbətən məhdud olduğunu söyləyib.
Onun sözlərinə görə, yoluxmaları nəzarətə almağın başlıca tədbirləri kontaktların izlənməsi və təcriddir.
Hazırda Avropa və Şimali Amerikanın ictimai səhiyyə orqanları meymunçiçəyi virusuna 100-dən artıq şübhəli və təsdiqlənmiş yoluxma hallarını araşdırırlar. Bu, virusun Afrikadan kənarda indiyədək ən böyük yayılmasıdır.
Virus onillərdir Afrikada endemik formada mövcuddur.
çap et