Avropa Parlamentinin deputatları Ukraynaya, Avropa İttifaqının üzvlüyünə namizəd statusu verməyə çağıran qətnamə qəbul ediblər. Avropa Komissiyası və Avropa İttifaqı Şurasına ünvanlanan bu sənəddə deyilir: “Ukrayna xalqı ilə həmrəyliyin aydın siyasi əlaməti kimi Ukraynaya namizəd statusu verin”.“Deutsche Welle” nəşrinin məlumatına görə, 438 deputat qətnamənin lehinə, 65 deputat əleyhinə səs verib, 94 deputat isə bitərəf qalıb.
Məlumatda deyilir ki, deputatlar həmçinin Avropa hökumətlərini dərhal “Ukraynaya lazımi silahlar verməyə, hərbi əməliyyatlar başa çatdıqdan sonra ölkənin yenidən qurulmasına maksimum töhfə verməyə hazır olmağa və Ukraynanın bərpası və ona dəymiş ziyanın kompensasiyası üçün, Rusiyaya məxsus dondurulmuş aktiv və vəsaitlərin müsadirə edilməsi üçün hüquqi mexanizm yaratmağa çağırıblar.
Mənbə yazır ki, Avropa Parlamentinin deputatları həmçinin BMT-nin xüsusi tribunalının çağırılması da daxil olmaqla, “Rusiyanın Ukraynada törətdiyi hərbi cinayətlərin” araşdırılmasına dəstək olmağı tövsiyə ediblər.
Qətnamədə həmçinin Moldova ilə Gürcüstanın Avropa Birliyinə qoşulmaq səyləri də qeyd olunur. Amma təqdim olunan sənəddə hələlik onlara namizəd statusunun verilməsi ilə bağlı tövsiyə olmadığı bildirilir. Məlumatda qeyd olunur ki, bu ölkələr Avropa Birliyi üzvlüyünə namizədlik ərizəsini Ukraynadan sonra veriblər.
Mənbə yazır ki, Ukrayna, bu il fevralın 24-də Rusiyanın hücumundan dərhal sonra, üzvlüklə bağlı Aİ-na müraciət edib, mayın 9-da isə ölkə namizəd statusu almaq üçün sonuncu rəsmi anketi təqdim edib.
çap et