Ukraynanın şərqindəki rusiyapərəst separatçı lider bazar günü iki britaniyalı və bir mərakeşliyə Ukrayna ordusunda döyüşdüyünə görə verilən ölüm hökmlərini dəyişdirməyəcəyini bildirib.Döyüşçüləri mühakimə edən separatçı Donetsk vilayətinin lideri Denis Puşilin jurnalistlərə açıqlamasında deyib: “Onlar pul müqabilində Ukraynaya dinc sakinləri öldürmək üçün gəliblər. Ona görə də cəzanın hər hansı yüngülləşdirilməsi və ya dəyişdirilməsi üçün heç bir şərt görmürəm”.
Puşilin deyib ki, məhkəmə üç döyüşçüyə “tam ədalətli cəza verib”.
O, həmçinin Böyük Britaniyanın baş naziri Boris Consonu onların taleyinə məhəl qoymamaqda və separatçı hakimiyyətlə əlaqə saxlamamaqda ittiham edib.
Puşilin Rusiya Müdafiə Nazirliyinin may ayında Rusiya və separatçı qüvvələr tərəfindən ələ keçirilən döyüşlərdən zərər çəkmiş Ukrayna şəhərinə təşkil etdiyi səfər çərçivəsində separatçı bölgənin paytaxtı Mariupolda AFP-nin iştirak etdiyi mətbuat konfransında danışıb.
Cümə günü Consonun sözçüsü britaniyalı Aiden Aslin, Şaun Pinner və mərakeşli Brahim Saaduna verilən ölüm hökmlərindən “dəhşətə düşdüyünü” söyləyib.
“Aydındır ki, onlar Donetskdəki separatçı hakimiyyətin ittiham etdiyi kimi muzdlu deyil, Ukrayna silahlı qüvvələrinin üzvləridir və buna görə də hərbi əsirdirlər”, – sözçü deyib.
Aslin və Pinnerin ailələrinin dediyinə görə, hər ikisi 2018-ci ildən bəri Ukraynada yaşayır.
Cümə günü Birləşmiş Millətlər Təşkilatı rusiyapərəst üsyançılar tərəfindən məhbuslara qarşı çıxarılan edam hökmlərindən narahat olduğunu bildirib.
çap et