Ukrayna iyulun 1-dən ölkəyə səfər etmək istəyən Rusiya vətəndaşları üçün viza rejimi tətbiq edəcək. Bu barədə iyunun 17-də prezident Vladimir Zelenski bəyanat verib.
Zelenskinin sözlərinə görə Kiyev bu addımı Ukraynanın milli təhlükəsizliyinə, suverenliyinə və ərazi bütövlüyünə Rusiya tərəfindən misli görünməmiş hədələrə görə atır.
Moskva Kiyevin bu qərarına hələki münasibət bildirməyib.
Hazırkı qaydalara görə rusiyalılar Ukraynaya vizasız səfər edə və bir dəfəyə 90 günədək bu ölkədə qala bilərdilər.
***
Bu il fevralın 24-də Rusiyanın Ukraynaya əsassız və səbəbsiz hücumuna görə Kiyev Moskva ilə bütün diplomatik münasibətlərini kəsib.
Ukrayna diplomatları Rusiyanı tərk ediblər. Rusiya vətəndaşlarına vizanın hansı dövlət qurumu tərəfindən veriləcəyi hələ açıqlanmayıb.
Rusiya ilə viza rejiminə keçidə dair petisiya Ukrayna prezidentinin saytında hələ fevralın 11-də dərc olunmuşdu. Petisiyaya imza atanların sayı məsələyə baxılması üçün zəruri olan 25 min nəfəri çoxdan keçmişdi.
İyunun 17-də Ukrayna hökuməti “Ukrayna və Rusiya hökumətləri arasında Ukrayna və Rusiya vətəndaşlarının qarşılıqlı vizasız səfərlərinə dair sazişi” dayandıran qətnamə qəbul edib.
Baş nazir Denis Şmıqal deyib ki, hökumət bu qətnaməsi ilə prezidentin sərəncamını icra edib.
Qətnamədə deyilir: “Rusiya ilə əlaqələri birdəfəlik kəsirik”.
çap et