2013-cü ilin yayında Türkiyədə «Gəzi parkı» etirazları zamanı güllə yarası alaraq, 269 gün komada qalan, bu günlərdə vəfat edən 15 yaşlı Berkin Əlvanın atası Sami Əlvan «CNN-türk» telekanalına açıqlamasında baş nazir Ərdoğanı ciddi tənqidə məruz qoyub.
«Turan» məlumatına görə, S.Əlvan oğlunun aksiyalarda iştirak etmədiyini, çörək almaq üçün getdiyi zaman polis gülləsilə vurulduğunu deyib.
«Mən bu gün oğlumu son mənzilə yola saldım, o isə övladını ifadə belə verməyə göndərmədi. Mənim oğlum qürurla getdi, oğurluqda ittiham olunmadı. Ona görə də bu xalq mənim övladımın arxasında idi», - S.Əlvan Ərdoğanı və oğlu Bilal Ərdoğanı korrupsiya və rüşvətdə suçlayıb.
S.Əlvan Ərdoğandan tək istəyinin oğlunun qatillərinin tapılması olduğunu deyib.
Ata oğlunun xəstəxanada komada qaldığı 9 ay ərzində rəsmilərdən heç kəsin onlarla maraqlanmadığını bildirib.
«Bu ölkənin vətəndaşıyıq, bu bayraq altında yaşayırıq, mən də bu dövlətə vergi ödəyirəm. Berkin çörək almağa getdi. O baş nazirə səslənirəm. İstəsə övladımın qatilini 1 saat içində gətirər. Əmri də o verdi və polis də əmr quludur. «Mənim polisim dastan yazdı»deyir Ərdoğan. Emri də o verib. Misirdə ölənlərə rəhmət dilədi, amma bizlərə başsağlığı belə vermədi», - S.Əlvan Ərdoğanı tənqid edib.
S.Əlvan Ərdoğana vicdanı varsa B.Əlvanın qatilini ortaya çıxarmasını istəyib.
çap et