Bir açıqlama ilə öz nazirliyini “baqaj”a qoyan general... Söhbət Rusiya “sülhməramlı”larının komandanından gedir.
Azərbaycan Müdafiə Nazirliyinin (MN) israrlı çağırışlarından sonra nəhayət ki, ərazilərimizdə müvəqqəti yerləşdirilən Rusiya “sülhməramlı” qüvvələrinin komandanı, general-mayor Andrey Volkov Rusiya Müdafiə Nazirliyinin rəsmi məlumatlarında ərazilərimizin adlarını uydurma erməni toponimləri ilə qeyd etməsi ilə bağlı məsələyə münasibət bildirib.
General-mayor Andrey Volkov belə deyib:
“Bir daha buradan mən elan etmək istəyirəm ki, biz bütün toponimləri dəstəkləyirik. Biz Azərbaycan tərəfinin yer adlarını necə var elə də yazırıq.
Məsələn: yazırıq Xankəndi, yazırıq Ağdərə. Bizim generalştabın xəritələrində isə adlar sovet dövründə qalıb. Stepanakert, Mardakert yazılıb. Toponimlərə nə aiddirsə, biz ona hörmət edərək Azərbaycanda necə səslənirsə elə də yazırıq.
Türkiyə-Rusiya Birgə Monitorinq Mərkəzində bütün sənədlərdə də yer adları Azərbaycan tərəfinin bizə göndərdiyi kimi yazılır. Rusiya Müdafiə Nazirliyinin saytında adlar başqa cür yazılır. Biz sülhməramlılar necə lazımdırsa, elə də yazırıq. Siz bizim sənədləri yoxlaya da bilərsiniz. Təəssüf ki, mən onlara görə cavab verə bilmərəm. Orada, hansınsa saytda səhv yazıla bilər. Biz necə lazımdırsa elə də yazırıq”.
Səmimi hərbçi və əsl sülhməramlı rolunu yaxşı oynamağa çalışan general Volkov bu açıqlaması ilə toponimlərimizlə bağlı məkrli davranışın əsas mənbəyi kimi Rusiya Müdafiə Nazirliyi və Kremli göstərmiş oldu.
Yəni ki, Azərbaycanı narazı salan bütün hərəkətlər, təxribatlar məhz Kremlin “mətbəx”ində hazırlanır.
P.S. Volkovun bu ifşa-açıqlamasından sonra Moskva yəqin ki, bu generalı cəzalandıracaq və onu daha “etibarlı” başqa bir generalla əvəzləyəcək.
çap et