ABŞ-ın Kaliforniya, Nevada, Arizona, Oreqon, Vaşinqton və Aydaho ştatlarında təqribən 146 milyon insanın təsirləndiyi, 27 nəfərin isə həddindən artıq istilər səbəbilə həyatını itirdiyi bildirilib.
ABŞ-ın bir çox ştatlarında keçən həftə həddindən artıq istilər nəticəsində azı 27 nəfər ölüb.
“Washington Post” qəzetinin məlumatına görə, ABŞ-da Kaliforniya, Nevada, Arizona, Oreqon, Vaşinqton və Aydaho ştatlarında təqribən 146 milyon insan həddindən artıq isti dalğasından əziyyət çəkib.
Termometrlər Nevada ştatının Las-Veqas şəhərində 48,8 dərəcə, Kaliforniya ştatının Barstou şəhərində isə 47,7 dərəcə göstərdiyi halda, bir çox bölgədə, xüsusən də ABŞ-ın qərbində rekord temperatur müşahidə olunur.
İsti hava şəraitinin həftə sonuna qədər davam edəcəyinə işarə edən meteoroloqlar əhaliyə diqqətli olmaları barədə xəbərdarlıq edib.
Səlahiyyətlilər həddindən artıq istilər səbəbindən Kaliforniyada 14, Oreqonda 10, Merilenddə 2 və Arizonada 1 nəfərin öldüyünü açıqlayıb.
Səhiyyə mütəxəssisləri həddindən artıq istilər nəticəsində dünyasını dəyişən 27 nəfərdən bəzilərinin yaşı 65-dən yuxarı olsa da, həyatını itirənlər arasında gənclərin də olduğuna diqqət çəkib.
ABŞ-da son illərdə həddindən artıq isti havanın yaratdığı ölüm halları artsa da, bu rəqəm 2021-ci ildə təxminən 1600, 2022-ci ildə təxminən 1700, 2023-cü ildə isə 2 min 300-ü keçib.
Duke Universitetinin İqlim Siyasəti İnnovasiya Mərkəzinin direktoru Eşli Uord (Ashley Ward), bu ölümlərin bildirilməsinin və təsnifləşdirilməsinin vacibliyinə diqqət çəkərək bildirib ki, keçmişdə istilərin təhlükələri ilə bağlı ictimaiyyətin diqqətini cəlb etmək çox çətin idi, lakin bu vəziyyət dəyişməyə başlayıb.
Uord qeyd edib ki, həddindən artıq isti havaya qarşı diqqətli olmaqda maarifləndirmə mühüm rol oynayır.
çap et