Bazar günü axşam sosial media hesabından prezidentlik yarışından çəkildiyini açıqlayan ABŞ prezidenti Co Baydenin səsi bu qərardan sonra ilk dəfə eşidilib. Baydenin geri çəkilmə bəyanatında dəstəyini açıqladığı vitse-prezident Kamala Harris bazar ertəsi axşam Delaver ştatının Uilminqton şəhərində seçki kampaniyası komandası ilə görüşüb.
Harris podiuma çıxmazdan əvvəl Co Bayden telefonla komandaya müraciət edib. “Covid-19” yoluxduğu üçün Delaverdəki bağ evində dincəldiyi açıqlanan Bayden, “Dünənki xəbərin təəccüblü olduğunu və çətin olduğunu bilirəm, amma bu doğru addım idi”, – deyib.
“Bülletendəki ad dəyişsə də, missiya heç vaxt dəyişməyib. Yeri gəlmişkən, mən də heç yerə getmirəm. Bu kampaniyada onunla, Kamala ilə olacam. Adım seçki bülletenində olmasa da, bu işlə tam məşğul olacağam”.
81 yaşlı Bayden Harrisə bütün məsələlərdə dəstək olacağına söz verdikdən sonra Respublikaçılar Partiyasının namizədi Donald Trampı məğlub etməyin vacibliyini də vurğulayıb.
Duq Emhof həyat yoldaşı Harrisi səhnəyə çağırmaq üçün podiuma gələndə Bayden hələ də telefonun digər ucunda idi. Harris çıxışına başlayarkən ABŞ prezidenti “Mən səni izləyirəm, qızım, səni çox sevirəm”, – deyib.
Demokratlar Partiyasının prezidentliyə namizədi olacağı gözlənilən Harris əllərini ürəyinin üzərinə qoyaraq cavab verib.
Bu telefon zəngi ilə Bayden həm Harrisə dəstəyini təkrarladı, həm də onun öldüyünə dair sui-qəsd nəzəriyyələrini puç etdi.
Geri çəkilmə bəyanatından sonra ABŞ prezidentinin cansıxıcı və ya ölü vəziyyətdə olduğu və bəyanatdakı imzasının saxta olduğu iddiaları irəli sürülüb.
Məsələn, milyarder Trampın tərəfdarlarından Bill Akman, “Əgər bu girovluq vəziyyəti olsaydı, o məktub onun sağ olduğuna dair sübut kimi göstərilməzdi”, – deyib.
“Turning Point USA” adlı mühafizəkar gənclər təşkilatının qurucu direktoru Çarli Kirk də Las Veqas polisinin ABŞ prezidentinin geri çəkilmə bəyanatından əvvəl təcili sağlamlıq müdaxiləsinə ehtiyacı olduğu üçün küçələri bağladığını iddia edib.
Rəsmi açıqlamalara görə, çərşənbə günü Las Veqasa seçki səfəri zamanı “Covid-19” yoluxan Bayden o vaxtdan bəri Delaver ştatının Rehobot şəhərindəki bağ evində dincəlir.
Dünənki çıxışında Kamala Harris, “Prezidentimiz bu gün bizimlə olmaq istədi. O, özünü daha yaxşı hiss edir, tez sağalır və yenidən yola çıxmağı səbirsizliklə gözləyir”, – deyib.
çap et