Böyük Britaniyada yerləşən təhlükəsizlik şirkəti Ukrayna ordusunu kəşfiyyat missiyalarını yerinə yetirə və müharibənin ön cəbhəsindəki əsgərlərə dərman çatdıra bilən robot itlərlə təchiz edib.“The Telegraph” qəzetinin yazdığına görə, 30-dan çox ikinci nəsil robot itlər “Brit Alliance” tərəfindən Ukraynaya verilib. Sözügedən robot itlər saatda 9 mil (14 km) sürətlə beş saata qədər səyahət edə bilir və döyüş meydanında lazım olan 7 kiloqramdan çox döyüş sursatı, tibbi ləvazimat və ya digər ləvazimatlarla təchiz oluna bilir.
Uzaqdan zondlama texnologiyası və infraqırmızı termal kameralarla təchiz edilmiş robot itlər dronların edə bilmədiyi xəndəkləri və binaları tapa bilir.
Kamuflyajlı istilik əleyhinə yorğana bükülmüş robot it Rusiyanın müşahidə aparan dronları tərəfindən aşkarlanmamaq üçün dovşanın bədən istisini yayır və bu onun aşkarlanmasını çətinləşdirir.
Robot itlərin digər üstünlüyü onların aşağı qiymətidir. Modeldən asılı olaraq hər bir robot itin qiyməti 3400 funt sterlinq (7500 manat) ilə 6800 funt sterlinq (15000 manat) arasında dəyişir.
***
“Brit Alliance”ın baş meneceri Kayl Torburn “The Telegraph” qəzetinə bildirib ki, şirkət Ukrayna ordusunun 28-ci briqadası ilə vaxt keçirib və orada “səngər müharibəsinin həlli üzərində işləyib”.
Bu cür itlərin “öldürmək üçün deyil, can qurtarmaq üçün” yaradıldığını vurğulayan Torburn, “burada bizim əsas məqsədimiz budur”, – deyib. Thorburn, istehsal etdikləri robot itin ən çətin döyüş şəraitində belə minaları tanımaq qabiliyyətinə malik olduğunu vurğulayıb.
Ukrayna ordusunun keçmiş müşaviri Valeri Ryabix bildirib ki, robot itlərin tapşırıqlarının dəyişdirilməsi və pilotsuz təyyarələr əvəzinə onlardan istifadə edilməsi cəbhədə böyük əhəmiyyət kəsb edəcək: “Xüsusilə də dronların çata bilmədiyi şəhər yerlərində və ya meşələrdə mühüm hədəfləri məhv etmək onlar üçün çox dəyərli bir işdir. Dünyadakı hərbçilər təhlükəli missiyalarda insanları əvəz etmək üçün robotlardan istifadə etməyə diqqət yetirdikcə, onların ön cəbhədə böyük gələcəyi var”.
Bununla belə, Ryabix əlavə edib ki, Britaniya şirkətinin istehsalı olan və hərbi deyil, mülki məqsədlər üçün istifadə edilən bu robot itin döyüş qabiliyyəti daha azdır.
çap et