“Audi”nin Brüsseldəki fabrikinin işçiləri bu gün işə çıxmayıb. Belçika mətbuatında çıxan xəbərə görə, “Audi” rəhbərliyi dünən elan etdi ki, “Volkswagen” qrupu tərəfindən Brüsseldəki fabrikə istehsal üçün heç bir model ayrılmayıb. Qeyri-müəyyənlikdən narahat olan işçilər fabrikin gələcək taleyinə aydınlıq gətirilməsini tələb edərək işə çıxmayıblar.
“Audi” Brussel işçiləri yaşadıqları problemlərə diqqət çəkmək üçün sentyabrın 16-da Brüsseldə etiraz aksiyası təşkil edəcəklər.
Alman avtomobil istehsalçısı “Volkswagen Group”a məxsus “Audi” markası, iyul ayında, tələbin azalması səbəbindən lüks seqmentli elektrikli avtomobil modeli “Q8”in istehsal edildiyi və təxminən 3 min insanın işlədiyi Brüsseldəki fabrikini yenidən quracağını açıqlayıb. Şirkət sözügedən modellərin istehsalının Meksikada davam etdiriləcəyini bildirib.
Bu vəziyyət fabrik işçilərini və həmkarlar ittifaqını narahat edib.
çap et