Fransada növbədənkənar ümumi seçkilərin qalibi olan solçu Yeni Xalq Cəbhəsi (NFP) ittifaqının çağırışı ilə minlərlə insan solçuların vahid namizədi Lüsi Kastetsin yerinə sağçı Mişel Barnyeni baş nazir vəzifəsinə təyin edən prezident Emmanuel Makrona etiraz olaraq nümayiş keçirib.
Daxili İşlər Nazirliyinin məlumatına görə, paytaxt Parisdə 26 mindən çox, ölkə üzrə isə 110 min nəfər “seçkilərin nəticələrinə məhəl qoymamaqda” ittiham etdikləri Makrona etiraz olaraq yürüş keçirib.
Ölkə boyu 150-dən çox yerdə Makron əleyhinə nümayişlər keçirilib. Paytaxt Parisdən başqa, Renn, Nant, Nitsa, Marsel və Strasburq da nümayişlərin keçirildiyi əsas şəhərlər sırasında olub.
Solçu NFP alyansının ən böyük partiyası olan “Boyun əyməyən Fransa”nın (LFI) Parlament Qrupu sədrinin müavini Matilda Panot, “X” platformasındakı hesabında etdiyi paylaşımda nümayişlərdə iştirakın daha çox olduğunu, Parisdə 160 min, ölkə daxilində 300 min adamın toplaşdığını iddia edib.
***
Avropa Parlamenti (AP) seçkilərində ifrat sağçıların qələbəsindən sonra Makron parlamenti buraxaraq 30 iyun və 7 iyulda ümumi seçkilər təyin edib.
Solçu NFP-nin ən çox mandat qazandığı seçkilərdə heç bir partiya və ya ittifaq 289 millət vəkilinin mütləq əksəriyyətini qazana bilmədi və seçkilər Fransa tarixindəki ən parçalanmış parlament mənzərəsini ortaya qoydu.
Makron ölkəsinin ev sahibliyi etdiyi 2024-cü il Paris Olimpiadası zamanı yeni baş nazir təyin etməyəcəyini və istefa ərizəsini təqdim edən Qabriel Attal hökumətinin bir müddət daha vəzifəsində qalmasını istədiyini bildirib.
Olimpiya Oyunları zamanı dayandırdığı danışıqlara avqustun 23-də başlayan Makron, seçkidə qalib gələn solçu ittifaqın ortaq baş nazir namizədi Lüsi Kastetsi təyin etməkdən imtina edərək, danışıqları davam etdirəcəyini bəyan edib. Daha mərkəz-sağçı Mişel Barnieri baş nazir təyin edib.
Fransada keçirilən növbədənkənar ümumi seçkilərdən sonra Fransa parlamentində ən böyük siyasi qrup 193 deputatla NFP, ikinci yerdə 166 deputatla Makronun hakim koalisiyası və 142 deputatla ifrat sağçı RN gəlir.
Fransa Konstitusiyasına görə, prezidentin istədiyi şəxsi baş nazir təyin etmək səlahiyyəti var, lakin siyasi ənənələrə görə, baş nazir ən çox səs toplayan partiya və ya alyansdan seçilir.
çap et