Portuqaliya hökuməti sentyabrın 7-də Lissabon həbsxanasından qaçan 5 məhbus üçün milli və beynəlxalq həyəcan təbili çalıb.
Daxili İşlər Nazirliyinin Təhlükəsizlik Sisteminin Baş Katibi Manuel Vieira mətbuata verdiyi açıqlamada bildirib ki, sentyabrın 7-də ikisi portuqaliyalı, biri argentinalı, biri britaniyalı və biri gürcü olmaqla 5 məhbus, paytaxt Lissabonun 70 kilometr şimalındakı Alcoentre qəsəbəsindəki “Vale de Judeus” həbsxanasından kənardan aldıqları yardımla qaçmağı bacarıb.
7 ildən 25 ilə qədər həbs cəzası alan məhkumların çoxunun təhlükəli olduğunu qeyd edən Vieira, ölkə daxilində bütün təhlükəsizlik sistemlərinin işə salındığını, qaçan şəxslərlə bağlı lazımi məlumatların İnterpol və Avropola verildiyini, beynəlxalq axtarış və həbs qərarı verildiyini bildirib. “İndi biz həm milli, həm də beynəlxalq səviyyədə informasiya dövriyyəsi ilə kifayət qədər rahatıq. Ediləcək hər şey edilib”.
Portuqaliya hökumət rəsmisi indiki mərhələdə sərhədlərin bağlanmasına ehtiyac olmadığını vurğulayıb.
“Narkotik ticarəti”, “çirkli pulların yuyulması”, “oğurluq”, “quldurluq”, “qəsb” mütəşəkkil cinayətkarlıq ittihamları ilə məhkum edilmiş qaçaq məhbusların şəxsiyyətləri Fernando Ribeiro Ferreira, Rodolf Jose Lohrmann, Mark Kameron Roskalir, Fabio Fernandes Santos Loureiro və Şergili Farjiani olduğu bildirilib.
Portuqaliya Polis Xidmətinin baş direktoru Luis Neves də qaçan məhbusların azadlıq üçün hər şeyi edə biləcəyi və onların təhlükəli və zorakılığa meylli olduqları barədə xəbərdarlıq edib. Məhkumların həbsxana divarına kənardan qoyulmuş nərdivandan istifadə edərək qaçdıqları və həbsxana rəhbərliyinə qarşı istintaqın davam etdiyi paylaşılıb.
Vale de Judeus uzunmüddətli məhbusların və çoxlu xarici məhbusların saxlandığı böyük həbsxana kimi tanınır.
çap et