Bu il Asiyanın ən şiddətli fırtınası olan “Yagi” qasırğası Vyetnamda infrastruktura və fabriklərə böyük ziyan vurub və onlarla insan həyatını itirib.Ötən həftənin əvvəlində Filippinin şimal bölgələrini viran qoyan, iki dəfə güclənərək Çinin cənub sahillərinə vuran “Yagi” tayfunu həftə sonu Vyetnam sahillərinə çatıb. Alimlər bildirirlər ki, tayfunlar iqlim dəyişikliyi səbəbindən okeanların istiləşməsinin təsiri ilə getdikcə güclənir.
Vyetnamın təbii fəlakətlərin idarə olunması agentliyi tayfunun daha çox törətdiyi sürüşmə və daşqınlar nəticəsində 46 nəfərin öldüyünü, 22 nəfərin isə itkin düşdüyünü açıqlayıb.
Tayfun şənbə günü yerli və xarici şirkətlərin böyük istehsal müəssisələrinin yerləşdiyi Vyetnamın şimal-şərq sahillərini vurub.
Qasırğa nəticəsində milyonlarla ev və şirkət işıqsız qalıb, magistral yollar su altında qalıb, telekommunikasiya şəbəkələri sıradan çıxıb, orta ölçülü körpü və minlərlə ağac uçub, bir çox sənaye mərkəzlərində iqtisadi fəaliyyət dayanıb.
Hadisə şahidinin sözlərinə görə, Cənubi Koreyanın “LG Electronics” şirkətinin Hayfonqdakı fabrikinin də divarları uçub.
Tayfuna verilən ad “Yaği”, keçi mənasını verən yapon sözüdür və yarı keçi yarı balıq olan mifik bir məxluq olan Oğlaq bürcünü təmsil edir.
çap et