İran ədliyyəsi ötən ay ölkəyə turist səfəri zamanı İnqilab Keşikçiləri Korpusu (SEPAH) tərəfindən saxlanılan iki Britaniya vətəndaşının casusluqda ittiham edildiyini bildirib.İran məhkəmə sisteminin sözçüsü Əsgər Cahangir bildirib ki, Kreyq və Lindsi Forman ölkəyə turist kimi daxil olub və müxtəlif əyalətlərdən məlumat toplayıblar: “Təhlükəsizlik əməkdaşları onları izləyib və ölkənin cənubundakı Kirman əyalətində həbs edib”. Rəsmi deyib ki, cütlük “kəşfiyyat xidmətləri ilə əlaqəli təşkilatlarla bağlıdır... Onlar İrana düşmən olan Qərb ölkələrinin kəşfiyyat xidmətlərinə çalışıblar”.
Britaniya mediası 50 yaşlarında olan britaniyalı cütlüyün dünya üzrə motosiklet turu zamanı İranda həbs olunduğunu bildirib. Britaniya Xarici İşlər Nazirliyi cümə günü konsulluq yardımını təsdiqləyib və ailələrin kimliyini açıqlayıb.
Fransa prezidenti Emmanuel Makron da İranda saxlanılan Fransa vətəndaşlarının ailələrinə onların azad edilməsi istiqamətində görülən işlər barədə məlumat verib.
Makron bazar ertəsi Sesil Koler, Jaka Barri və Olivye Qrondo ailələri ilə bir saatdan çox danışıb. “Prezident bizə girovların azad edilməsi üçün aparılan danışıqlar barədə bəzi məlumat verdi, ailələr üçün konkret elementlər əldə etmək vacib idi. Bu, bizə əmin olmağa imkan verdi ki, səlahiyyətlilər qohumlarımızı azad etmək üçün səylər göstərirlər,”– Sesilin bacısı Noemi Koller deyib.
İran hakimiyyəti casusluq ittihamı ilə onlarla ikili vətəndaşlığı və əcnəbini saxlayıb, lakin həbslərin diplomatik məqsədlər üçün edildiyini təkzib edib.
çap et