Ukrayna prezidenti Vladimir Zelenski prezident Rəcəb Tayyib Ərdoğanın dəvəti ilə dünən Ankaraya səfər edib. Zelenski Səudiyyə Ərəbistanında keçiriləcək ABŞ-Rusiya danışıqlarına dəvət edilməməsinə reaksiya verib və bu açıqlamaları verib: “Ukrayna masa arxasında olmadan Rusiya və Amerika nümayəndələri arasında Ukrayna ilə bağlı danışıqlar gedir”.ABŞ prezidenti Donald Tramp dünən verdiyi açıqlamada Ukraynanın müharibəni daha əvvəl bitirmək imkanının olduğunu, lakin Co Bayden administrasiyasının dəstəyi ilə münaqişəni davam etdirməyi seçdiyini deyib: “Bu gün eşitdim ki, “bizi dəvət etməyiblər” deyirlər. Üç ildir ordasan, üç il əvvəl bitirməliydin. Heç başlamalıydın. Daha əvvəl razılaşma əldə edə bilərdiniz. Mən Ukrayna üçün demək olar ki, bütün torpaqlarını onlara verəcək bir müqavilə bağlaya bilərdim. Lakin onlar bunu belə etməməyi seçdilər. Prezident Baydenin bu məsələdə nə qədər yanıldığını bilmir”.
Ayın sonuna kimi Rusiya prezidenti Vladimir Putinlə görüşəcəyini deyən Tramp Ukraynada seçkilərin keçirilməli olduğunu da bildirib.
Britaniyanın “The Guardian” qəzeti Putinin də belə bir xahişlə çıxış etdiyini xatırladaraq Trampın Kremlin mövqeyindən danışdığını qiymətləndirir. Zelenski 2019-cu ildə 5 illik müddətə seçilib, lakin 2022-ci ildə Putinin göstərişi ilə müharibə başlayanda Ukraynada hərbi vəziyyət elan edilib və seçkilər təxirə salınıb.
Avropa Birliyinin (AB) Xarici Əlaqələr və Təhlükəsizlik Siyasəti üzrə Ali Nümayəndəsi Kaja Kallas “X” hesabındakı paylaşımında ABŞ-ı Rusiyanın tərəfində olmamağa çağırıb: “Rusiya bizi parçalamağa çalışacaq. Gəlin onların tələsinə düşməyək. ABŞ-la işləməklə biz Ukraynanın şərtləri ilə ədalətli və davamlı sülhə nail ola bilərik”.
AB Komissiyasının sədri Ursula von der Leyen Trampın sözlərinə birbaşa cavab verməsə də, dünən açıqlanan 16-cı sanksiya paketi ilə bağlı açıqlamasında “Kremlə təzyiq etməyə davam edəcəyik”, – deyib.
Digər tərəfdən, Böyük Britaniya media qurumu BBC yazır ki, ukraynalı əsgərlər və mülki vətəndaşlar sülh danışıqlarına o qədər də ümid etmirlər.
Ukraynanın şimalındakı Sumı şəhərində yaşayan 33 yaşlı Yuliya Trampla Putinin yaxınlaşmasını tənqid edərək, “Biz Putinə etibar edə bilmərik”, – deyib.
70 yaşlı istefada olan polkovnik Boris deyir: “Nə qədər ki, Putin başçılıq edir, ruslara etibar etmək olmaz. Çünki ona tanrı kimi ibadət edirlər. Siz onları dəyişdirə bilməzsiniz. Bu zaman tələb edir. Ukrayna sülh haqqında düşünməlidir. Amma biz təslim olmamalıyıq”.
Amerika mediası CNN öz təhlilində qeyd edir ki, Tramp Putinlə əməkdaşlıq edərək “Ukraynaya zərbə vurub”.
çap et