Rusiya Ukrayna münaqişəsinin həlli çərçivəsində 300 milyard dollar dəyərində dondurulmuş aktivlərdən imtina edəcəyi barədə nüanslar çıxıb. Moskva bu vəsaitin bir hissəsinin onun nəzarətində olan ərazilərin bərpasına yönəldilməsində israr edəcəyi bəllidir.
“Reuters”in Kremldəki mənbəyə yaxın şəxsin məlumatına görə, Avropa İttifaqı 2024-cü ilin may ayında Rusiyanın dondurulmuş aktivlərini geri qaytarmamaq barədə qərar versə də, Rusiya bu aktivlərin bloklanmasının ləğvini sanksiyaların yumşaldılması çərçivəsində tələb edəcək.
“Bundan əvvəl Rusiyanın dondurulmuş vəsaitlərin Ukraynanın bərpasına yönəldilməsinə razı ola biləcəyi barədə məlumat verilməmişdi. Bu, Moskvanın hansı kompromislərə hazır olduğunu göstərir”, – nəşr yazır.
Rusiya rəsmiləri dəfələrlə xəbərdarlıq ediblər ki, dövlət səviyyəsində aktivlərin müsadirəsi azad bazar prinsiplərinə ziddir, bank təhlükəsizliyini sarsıdır və ehtiyat valyutalara inamı zəiflədir.
“Reuters”in məlumatına görə, Rusiyanın döyüşlərin dayandırılması üçün əsas tələbləri Kiyev qoşunlarının Moskvanın iddia etdiyi ərazilərdən çıxarılması və Ukraynanın NATO-ya qoşulmaq niyyətindən imtina etməsidir. Digər tərəfdən, Ukrayna Rusiya qoşunlarının dünya və BMT tərəfindən tanınan ərazilərindən tamamilə çıxarılmasını və Qərb ölkələrindən təhlükəsizlik zəmanəti tələb edir. Tramp administrasiyası isə Ukraynanın bu haqlı tələblərini “reallıqdan uzaq” və “xəyali” hesab edir.
“Reuters” qeyd edir ki, Rusiyanın dondurulmuş aktivlərinin istifadəsi məsələsinin Rusiya və ABŞ nümayəndələri arasında Səudiyyə Ərəbistanında keçirilən görüşdə müzakirə olunub-olunmadığını müəyyənləşdirmək mümkün olmayıb.
çap et