Rusiyanın xarici işlər naziri Sergey Lavrov sabah Ankaraya səfər edəcək. Diplomatik mənbələrdən əldə edilən məlumata görə, Lavrov xarici işlər naziri Hakan Fidanla görüşəcək.Fidanın rusiyalı həmkarı ilə görüşündə ikitərəfli əməkdaşlıq məsələləri, xüsusilə ticarət, enerji və turizm hərtərəfli müzakirə olunacaq.
Görüşdə Ukraynadakı müharibənin diplomatik səylərlə ədalətli və davamlı sülhlə sona çatması ilə bağlı fikir mübadiləsi aparılacaq, ABŞ və Rusiya arasında son təmaslar və Türkiyənin bu prosesə verə biləcəyi töhfələr qiymətləndiriləcək və 2022-ci ilin martında Rusiya ilə Ukrayna arasında birbaşa danışıqlara ev sahibliyi edən Türkiyənin bu rolu qarşıdakı günlərdə boynuna götürməyə hazır olduğu vurğulanacaq.
Suriya və Yaxın Şərq başda olmaqla regional və beynəlxalq məsələlərin ətraflı müzakirə olunacağı görüşdə nazir Fidanın Türkiyənin Suriyanı terror ünsürlərindən tamamilə təmizləmək əzmində olduğunu qeyd edərək Suriyanın ərazi bütövlüyü və siyasi birliyinin qorunmasının vacib olduğunun vurğulanması gözlənilir.
Fidanın Suriyada sabitliyin bərqərar olması üçün yenidənqurma işlərinin başlanmasının zəruriliyinə diqqət çəkməsi gözlənilir.
Nazir Fidanın da Qəzzada atəşkəsin qalıcı olması və çatdırılan humanitar yardımların artırılmasının vacibliyini bildirməsi, fələstinlilərin öz vətənlərindən zorla köçürülməsinin qəbuledilməz olduğunu qeyd etməsi və Yaxın Şərqdə sülhün yalnız iki dövlətli həll əsasında təmin oluna biləcəyini vurğulaması gözlənilir.
Lavrov Türkiyəyə son səfərini 18 oktyabr 2024-cü ildə “3+3” Regional Əməkdaşlıq Platforması iclası çərçivəsində edib.
Nazir Fidan sonuncu dəfə fevralın 20-də Yohannesburqda “G20” Xarici İşlər Nazirləri Toplantısı çərçivəsində Lavrovla görüşüb.
çap et