Beynəlxalq Atom Enerjisi Agentliyi (MAQATE) İranın silah gücünə yaxın 60 faiz zənginləşdirilmiş uran ehtiyatı saxlamasından ciddi narahatlığını bildirib.
MAQATE-nin direktoru Rafael Qrossi iki ayrı hesabatda bəyan edilməmiş ərazilərdə uran izləri ilə bağlı izahat verilməməsi də daxil olmaqla, həll edilməmiş məsələlərdə irəliləyişin olmadığını vurğulayıb. Hesabatlardan birində İranın 60 faiz zənginləşdirilmiş uran ehtiyatının 274,4 kiloqram olduğu və bunun 90 faiz zənginləşdirilməsi halında altı nüvə bombası hazırlamaq üçün kifayət edəcəyi bildirilib. “İran yüksək zənginləşdirilmiş uran istehsalını və ehtiyatını artırmağa davam edir ki, bu da ciddi narahatlıq doğurur”, – Qrossi deyib.
Bu, ABŞ prezidenti Donald Trampın Tehrana razılaşmaya təzyiq etmək üçün “maksimum təzyiq” siyasətinə qayıtmasından sonra MAQATE-nin İranla bağlı ilk hesabatıdır.
Digər tərəfdən, ABŞ dövlət katibi Marko Rubio baş nazir Məhəmməd Şia əl-Sudani ilə telefon danışığında “İranın bədxah təsirinin qarşısının alınmasını” müzakirə etdiklərini bildirib.
çap et