ABŞ Şimali Koreyalı hakerləri tarixdə ən böyük kriptovalyuta oğurluğu törətməkdə ittiham edir.ABŞ Federal Təhqiqat Bürosu (FTB) Pxenyanı 1,5 milyard dollar dəyərində kriptovalyuta qarətinin arxasında durmaqda günahlandırıb. Ötən həftə Dubayda yerləşən kriptovalyuta birjası Bybit böyük bir kiberhücuma məruz qaldı. Təxminən 1,5 milyard dollar dəyərində Ethereum (ETH) kriptovalyutası oğurlanıb. Şirkətdən verilən açıqlamada quldurların əməliyyat zamanı hakerlərin təhlükəsizlik protokollarından yan keçərək rəqəmsal aktivləri başqa ünvana köçürdüklərini bildirilib.
FTB oğurluqda Şimali Koreyanın dəstəklədiyi haker qrupunu günahlandırıb. “Şimali Koreya Bybit kriptovalyuta birjasından təqribən 1,5 milyard dollar dəyərində rəqəmsal aktivlərin oğurlanmasına görə məsuliyyət daşıyır”, – bəyanatda deyilir.
Açıqlamada oğurluğun arxasında “Lazarus Group” kimi tanınan “TraderTraitor”un olduğu və haker qrupunun oğurluğu sürətlə həyata keçirdiyi deyilir. Hakerlərin oğurlanan kriptovalyutaların bir hissəsinin Bitcoin və digər virtual valyutaya çevrildiyi bildirilib. FTB, oğurlanmış aktivlərin yuyulmasının və rəsmi pula çevrilməsinin gözlənildiyini bildirib.
“Lazarus Group”un 2022-ci ildə Ronin Şəbəkəsindən 620 milyon dollar dəyərində Ethereum və USD Coin oğurlanmasının da arxasında olduğu iddia edilir. Həmin oğurluq hadisəsi ən böyük kriptovalyuta oğurluğu kimi qeydə alınıb. 2024-cü ilin dekabrında ABŞ və Yaponiya Yaponiyada yerləşən DMM Bitcoin-dən 300 milyon dollar dəyərində kriptovalyutanın oğurlanmasına görə qrupu günahkar bilmişdi.
Cənubi Koreya Kəşfiyyat Xidmətinin məlumatına görə, Şimali Koreya son beş ildə təxminən 1,2 milyard dollar dəyərində kriptovalyuta və rəqəmsal aktivləri qarət edib.
çap et