ABŞ prezidenti Barak Obama Türkiyənin baş naziri Rəcəb Tayyibi Ərdoğana zəng edərək baş naziri partiyasının bələdiyyə seçkilərində qalib gəldiyinə görə təbrik etməyəcək.
ANS PRESS-in məlumatına görə, bunu ABŞ-ın Ankaradakı səfiri Frenk Rikkardone deyib. Onun sözlərinə görə, Barak Obama R.T.Ərdoğana ona görə zəng etməyəcək ki, ABŞ hökumətində bələdiyyə seçkilərinə o qədər də önəm verilmir.
“Əgər martın 30-da Türkiyədə parlament seçkiləri keçirilsəydi, ABŞ prezidenti Ərdoğanı təbrik edərdi”, - deyə Frenk Rikkardone bildirib.
ABŞ səfiri bələdiyyə seçkilərindən sonra Türkiyənin böyük şəhərlərində qələbə qazanmış namizədləri təbrik edib. Lakin Ankara Böyükşəhər Bələdiyyə sədri seçilən AKP-li Melih Gökçek təbrik edilənlərin siyahısında yer almayıb.
Qeyd edək ki, martın 30-da Türkiyədə keçirilən bələdiyyə seçkilərinin nəticələrinə əsasən hakim Ədalət və İnkişaf partiyasından Melih Gökçek qələbə qazanmışdı. Lakin Cümhuriyyət Xalq Partiyası iddia edirdi ki, AKP səsvermənin nəticələrini saxtalaşdırıb. çap et