Putin atəşkəsi rədd edərsə, Tramp nə edəcək?

ABŞ kəşfiyyatının hesabatları Rusiyanın geri çəkilməyəcəyini göstərir

Putin dünən verdiyi açıqlamada ABŞ-ın hazırladığı fövqəladə atəşkəs planının tərəfdarı olduqlarını, lakin nəzarətlə bağlı bəzi məsələlərin aydınlaşdırılmasına ehtiyac olduğunu bildirib.

Rusiya lideri bu məsələləri müzakirə etmək üçün Trampla telefon danışığı apara biləcəyini ifadə edərək, “Biz bu məsələyə sülh yolu ilə son qoymaq ideyasını dəstəkləyirik”, – deyib.

“The Wall Street Journal” yazır ki, atəşkəs razılaşması Tramp administrasiyasının Moskva ilə danışıqlarından asılıdır. Bildirilir ki, Rusiya atəşkəsi tamamilə rədd etməkdənsə, əhəmiyyətli güzəştlər tələb edə bilər ki, bu da Respublikaçı liderə təzyiqləri artıracaq.

Həmçinin qeyd olunur ki, Kreml razılaşmaya razı olmasa, Vaşinqton yeni sanksiyalar tətbiq etməli ola bilər.

Respublikaçılar Moskvaya təzyiqin artırılmasını tələb edirlər. Trampın tərəfdarı respublikaçı senator Mayk Rounds deyib: “Putin Ukraynaya qarşı etdiklərinə görə daha çox təzyiqə layiqdir”.

Digər tərəfdən, Trampa yaxın adlardan biri olan respublikaçı senator Lindsi Qraham, iki gün əvvəl sosial mediada etdiyi paylaşımda, “Rusiyanın atəşkəsi qəbul edəcəyinə və bu müharibəni bitirmək istədiyinə çox şübhə edirəm”, – deyib.

“The Washington Post”a anonimlik şərti ilə danışan Amerika kəşfiyyat rəsmiləri də deyirlər ki, Putin Ukrayna üzərindəki hökmranlığını itirmək istəmir.

Tramp administrasiyasına göndərilən 6 mart tarixli kəşfiyyat hesabatında Putinin sülh tərəfdarı olmadığı iddia edilir. Həmçinin iddia edilir ki, Moskva atəşkəs dövründən istifadə edərək ordunu yenidən gücləndirə və yenidən hücuma keçə bilər.

“The Washington Post”un başqa bir təhlili isə Rusiyanın ilhaq etdiyi torpaqlardan geri çəkilmək istəmədiyini iddia edir. Ukrayna prezidenti Vladimir Zelenski sülh sazişi ilə işğal etdikləri ərazilərdən imtina etməyəcəklərini bildirib. Kremlin sözçüsü Dmitri Peskov dünən verdiyi açıqlamada belə deyib.

“Krım, Sevastopol, Xerson, Zaporojya, Donetsk və Luqansk Rusiyaya məxsus bölgələrdir. Onlar bizim Konstitusiyamızda var. Bu faktdır”, – Peskov deyib.

Fransa və Böyük Britaniya da “NATO sülhməramlı qüvvələri” adı altında Ukraynaya qoşun yeritməyi planlaşdırır. Kreml buna da qarşı çıxır.