Artan ticarət gərginliyi və ABŞ-ın faiz dərəcələrini aşağı salmaqla investorlar üçün təhlükəsiz sığınacaq olacağına dair gözləntilər fonunda qızıl bu gün tarixində ilk dəfə olaraq 3000 dollar/unsiya səviyyəsini keçib.Spot qızıl 0,4 faiz bahalaşaraq bir unsiya üçün 3000,39 dollara çatıb və 2025-ci ildə 14 faizdən çox bahalaşıb. “Reuters” xəbər verir ki, ABŞ-ın qızıl fyuçersləri də 0,7 faiz artaraq 3 012,90 dollar olub.
Almaniyadakı “Heraeus Metals”in qiymətli metallar treyderi Aleksander Zumpfe, “Geosiyasi gərginliyin artması, ticarət müharibəsi narahatlıqlarının artması və maliyyə bazarındakı qeyri-müəyyənliyin artması fonunda investorlar getdikcə sabitlik axtarır və bunu da qızılda tapırlar. Qızıl 3000 dollar həddini keçdiyi üçün qısamüddətli mənfəət əldə etmək qiymətə müvəqqəti təzyiq göstərə bilər”, – deyib.
ABŞ Prezidenti Donald Trampın tarifləri, xüsusilə maliyyə bazarlarını narahat edən və tənəzzül qorxusunu artıran qlobal ticarət müharibəsi fonunda qızıla tələbatın artmasında böyük rol oynayıb. Tramp bundan əvvəl Avropa Birliyinin (AB) bəzi malların idxalına 200 faizlik gömrük rüsumları tətbiq etməklə hədələmişdi.
Bu arada, dünyanın ən böyük qızılla dəstəklənən birja ticarəti fondu olan “SPDR Gold Trust”, aktivlərinin 2023-cü ilin avqustundan bəri ən yüksək səviyyə olan 905,81 metrik tona çatdığını açıqlayıb. Bu kontekstdə məlumatlar ABŞ-da istehlak qiymətlərinin analitiklərin gözlədiyindən daha çox düşdüyünü göstərdi ki, bu da FED-in faiz dərəcələrini daha da azaltmasına zəmin yarada bilər.
“Exinity Group”un baş analitiki Han Tan, “Gələn həftənin FOMC qərarı, sədr Cerom Pauelin siqnalları ilə birlikdə, spot qızılın 3,000 dollardan yuxarı və ya aşağıda qalacağını müəyyən edəcək”, – deyib.
İnvestorlar siyasətçilərin iyun ayında borclanma xərclərini azaltmağa davam edəcəklərini gözləyirdilər.
“ANZ Bank”ın analitikləri qızılın qiymətinin 2025-ci ildə bir unsiya üçün 3050 dollar səviyyəsinə çata biləcəyini bildiriblər.
Digər metallarda spot gümüş 0,5 faiz bahalaşaraq bir unsiya üçün 33,96 dollara, platin 0,9 faiz ucuzlaşaraq 985,00 dollara, palladium isə 0,4 faiz artaraq 961,91 dollara satılıb.
çap et