Dünən ABŞ prezidenti Donald Tramp tərəfindən açıqlanan ilk 6-cı nəsil döyüş təyyarəsi olan “F-47” bu gün dünya mediasının ən önəmli gündəm mövzularından birinə çevrilib. “The Associated Press” (AP) xəbər agentliyi təyyarənin qiymətinin və zərurətinin ölkədə müzakirələrə səbəb olduğunu qeyd etsə də, Pentaqon təyyarənin hazırkı donanmadan çox kənarda gizli və nüfuz etmə qabiliyyətinə malik və Çinlə potensial münaqişədə vacib olacağını bildirir.“F-35” ilə bağlı müzakirələr davam edərkən, ABŞ prezidenti Donald Tramp dünən dünyanın ilk 6-cı nəsil döyüş təyyarəsi olaraq F-47 istehsalına başlayacaqlarını açıqladı.
ABŞ prezidenti Tramp Oval kabinetdə keçirilən mərasimdə ölkəsinin 6-cı nəsil döyüş təyyarələrinə keçid planını açıqlayıb.
***
“Mənim göstərişimlə ABŞ Hərbi Hava Qüvvələri dünyanın ilk 6-cı nəsil döyüş təyyarəsinə keçəcək və bu təyyarə generalların seçdiyi “F-47” adıyla tanınacaq”, – Tramp deyib.
***
Təyyarənin “Boeing” tərəfindən istehsal ediləcəyini deyən Tramp, “F-47 indiyə qədər istehsal edilmiş ən qabaqcıl, qabiliyyətli və ölümcül təyyarə olacaq. Təyyarənin eksperimental versiyası demək olar ki, beş ildir gizli şəkildə uçur. Bu təyyarələrdən yeni bir donanma qurulacaq və mənim rəhbərliyim zamanı yaxın bir neçə il ərzində havada olacaq”, – deyib.
***
Pentaqon bildirir ki, bu təyyarə hazırkı donanmadan çox kənarda gizli və nüfuz etmə qabiliyyətinə malik olacaq və Çinlə potensial münaqişədə vacib olacaq.
Nə Tramp, nə də Pentaqon nə qədər təyyarənin istehsal ediləcəyini və nə qədər başa gələcəyini açıqlamasa da, Hərbi Hava Qüvvələrinin Baş Qərargah rəisi general Devid Olvin “F-22”lərdən daha çox “F-47” istehsal ediləcəyini bildirib. Hazırda ABŞ-ın hər biri 143 milyon dollara başa gələn təxminən 180 ədəd “F-22” döyüş təyyarəsi var.
***
“AP” xəbər agentliyinin məlumatına görə, proqramın dəyəri və zəruriliyi ABŞ-da mübahisələrə səbəb olub. Pentaqon hələ də vergi ödəyicilərinə həddindən artıq baha başa gəlməsi gözlənilən ən qabaqcıl təyyarəsi olan “F-35”i istehsal etmək üçün mübarizə aparır. Pentaqonun gizli bombardmançısı, 2026-2027-ci illərdə xidmətə girməsi gözlənilən “B-21 Raider” isə “F-47” ilə eyni texnologiyalara malikdir.
***
ABŞ-ın “The New York Times” qəzetinin yazdığına görə, “F-47” Trampın vədlərini yerinə yetirsə, dünyanın ən qabaqcıl döyüş təyyarəsi ola bilər. Rusiya və Çin öz altıncı nəsil döyüş təyyarələri üzərində işləyərkən, Avropa ölkələri də diqqətlərini bu təyyarələrə yönəldiblər.
çap et