ABŞ-ın təzyiqindən sonra İranın Yəməndə husilərə dəstəyi kəsməyi planlaşdırdığı bildirilir. Adının çəkilməsini istəməyən “The Telegraph”a danışan İran rəsmisi bildirib ki, hərbçilərə Yəməndən geri çəkilmək əmri verilib. Mənbə ABŞ-ın hücumları zamanı bir iranlı əsgərin öldürülməsinin gərginliyi artıracağına dair narahatlıqların olduğunu bildirib.Həmçinin bildirilir ki, Tehran administrasiyası ABŞ prezidenti Donald Trampın yürütdüyü siyasətə görə bölgədəki müxtəlif qüvvələrə, xüsusilə husilərə dəstəyi kəskin şəkildə azaltmağı planlaşdırır. Rəsmi deyir ki, İran birbaşa Tramp administrasiyasından gələ biləcək təhdidlərə diqqət yetirir: “Hər görüşdə Trampla bağlı müzakirələr gedir. Bizim dəstəklədiyimiz regional qrupların heç biri müzakirə olunmur”.
İran rəsmisi Yaxın Şərqdə baş verən son hadisələrə də diqqət çəkir və husilərin “son günlərini yaşadığını” iddia edib: “Burada Husilərin sağ qala bilməyəcəyi və onların son aylarını, hətta günlərini yaşadığına dair bir fikir hakimdir. Ona görə də onları siyahımızda saxlamağın mənası yoxdur. Onlar “Hizbullah”ın keçmiş lideri Həsən Nəsrullah və Suriyanın keçmiş lideri Bəşər Əsədə aparan zəncirin bir hissəsi idilər. Bu zəncirin yalnız bir parçasını gələcək üçün saxlamağın mənası yoxdur”.
“The Telegraph”ın xəbərində Tehran hökumətinin Əsəd rejiminin devrilməsinin və ya “Hizbullah”ın İsrailə qarşı verdiyi itkilərin qarşısını ala bilmədiyi və husilərin yaranmış hakimiyyət boşluğundan yararlanmaq istədikləri qeyd edilir. Bunun qarşısını almaq və İrana təzyiqləri artırmaq üçün ABŞ-ın da işə qarışdığı bildirilir.
CNN bildirib ki, ABŞ İran və Husiləri qorxutmaq məqsədilə Hind okeanına “B2” gizli bombardmançıları yerləşdirib.
ABŞ-ın keçmiş prezidenti Co Bayden 2021-ci ildə husiləri terror təşkilatı siyahısından çıxardı. Ancaq Tramp vəzifəyə gələn kimi yaralıları yenidən siyahıya saldı.
Tramp keçən ay husilərə qarşı hücumlar əmrini verib və bombardmanlar nəticəsində ən azı 61 nəfər ölüb, 140-dan çox insan yaralanıb. Husilər Qəzza müharibəsində HƏMAS-ı dəstəklədiklərini bəyan etdilər və bölgədə dəniz fəaliyyətini pozan hücumlar həyata keçirdilər.
Tramp martın 5-də İran rejiminin ali dini lideri Əli Xameneyiyə məktub göndərdiyini və nüvə proqramı ilə bağlı razılaşma əldə etmək istədiyini bildirib. “Mən onlara məktub yazdım ki, “Ümid edirəm ki, siz danışıqlar aparacaqsınız, çünki ordumuzu ölkənizə gətirməli olsaq, bu, dəhşətli bir şey olardı””, – respublikaçı prezident bildirib.
Xameneyi isə Trampın danışıqlar çağırışını və təhdidlərini rədd etdiklərini açıqlayıb. İran prezidenti Məsud Pezeşkian da Trampa "Məni təhdid etdiyiniz üçün sizinlə danışıqlar aparmayacağam. Nə istəyirsiniz edin”, – deyib.
çap et