Avstraliya Federal Polisi (AFP) Kuala Lumpurdan Sidneyə gedən təyyarədə baş verən hadisə ilə bağlı yazılı açıqlama yayıb.Açıqlamada 46 yaşlı sərnişinin uçuş zamanı təyyarənin arxasındakı təcili çıxış qapısını açmağa çalışdığı və ekipajın müdaxiləsi ilə öz yerinə aparıldığı bildirilib.
Məlumata görə, eyni sərnişin daha sonra təyyarənin ortasındakı təcili çıxış qapısını açmağa çalışıb və stüardessalar və sərnişinlər tərəfindən saxlanarkən aviaşirkətin əməkdaşına hücum edib.
Açıqlamada, təyyarə Sidneyə endikdən sonra qapını açmağa çalışan sərnişinin nəzarətə alındığı və təyyarənin təhlükəsizliyini riskə atmaq və ekipaja hücum etmək ittihamı ilə 10 ilə qədər həbs oluna biləcəyi qeyd edilib.
“ABC News”un məlumatına görə, sərnişinin vəkili müvəkkilinin təyyarəyə minməzdən əvvəl yuxu dərmanı və spirtli içki qəbul etdiyini və hadisəni xatırlamadığını deyib.
çap et