Fransada həbsxanalarda sıxlıq həm insan haqları, həm də iqtisadiyyat baxımından böyük problemlər yaradır. Ölkəyə hər il 4 milyard avro zərər vuran bu problemin həlli üçün axtarışlar davam edir. Ədliyyə naziri Gerald Darmanin bu problemin həlli olaraq prefabrik həbsxanaların tikiləcəyini açıqlayıb. Birinci mərhələdə yarımaçıq və ya qısamüddətli həbs cəzası almış məhkumlar üçün 3000 yeni yer yaradılacaq. İlk 50 nəfərlik obyektin Aube bölgəsindəki Troyesdə tikilməsi planlaşdırılır.Darmanin qeyd edib ki, bu strukturlar ənənəvi həbsxanalarla müqayisədə daha sürətli və yarı qiymətə tikilə bilər. Klassik həbsxana yeri 400 min avroya başa gəlirsə, prefabrik həbsxanada bu rəqəm 200 min avroya düşür.
1 mart 2025-ci il tarixinə Fransada 62 539 tutumlu həbsxanalarda 82 152 məhbus var. Bəzi təcridxana tiplərində bu nisbət 160 faizə çatır. 4850-dən çox məhbus döşəmədə yatmağa məcburdur. Bu sıxlığın dövlətə illik xərci təxminən 4 milyard avrodur.
Həbsxanalardakı bu böhran bilavasitə son illərdə ölkədə getdikcə sərtləşən məhkəmə qərarları ilə bağlıdır. Xüsusilə məişət zorakılığı, yol hərəkəti pozuntuları və təhlükəsizlik qüvvələrinə hücumlara görə cəzaların artırılması saxlanılanların sayını xeyli artırıb. Elektron bilərziklər və ictimai xidmət kimi alternativ cəzalar artıma baxmayaraq məhdud təsir göstərib.
çap et